یہ نظم نہیں ہے، نظم کی صورت میں ہمارے سامنے شاعر کھڑا ہے۔
یا ہم خود کو دیکھ رہے ہیں۔
اب اس دکھ کی طرف چلتے ہیں جو ہمیں بھی محسوس ہوتا ہے۔
جانے والوں کی طرح نہیں تو بہت حد تک ہم بھی محسوس کر سکتے ہیں۔
کیونکہ ہم بھی "پاکستان" ہیں۔
اپنی بیٹی سے چند دن پہلے کہہ رہی تھی کہ پاکستان اگر سانس لیتا، چلتا پھرتا ہوتا تو کیا سوچتا ہمارے بارے میں۔ ہم نے اس کا کیا حال کر دیا۔ کس قدر شرمندگی ہوتی ہے۔
سوہنی دھرتی اللہ رکھے قدم قدم آباد تجھے
پاکستان کا یہ حال کرنے میں ہم سب برابر کے شریک ہیں ۔ الزام کسی پر کم اور کسی پر زیادہ تو لگایا جاسکتا ہے لیکن یہ ایک اجتماعی جرم ہے ۔ معاشرہ افراد سے مل کر بنتا ہے چنانچہ معاشرے کو سیدھی سمت میں گامزن رکھنے کی کوشش کرنا ہر فرد کی ذمہ داری ہے ۔ ہم میں سے کتنے لوگ ہیں جو اپنے کسی دوست یا رشتہ دار سے اس بنا پر قطع تعلق کرلیتے ہیں کہ وہ دھوکہ دہی، ملاوٹ یا حرام خوری میں مبتلا ہے ۔ ہم تو ایسے لوگوں کو علی الاعلان برا کہنے کی جرات بھی نہیں رکھتے۔ سو ایسی صورت میں معاشرے میں کرپشن نارمل بن جاتی ہے ۔ کرپشن نا انصافی اور ظلم کو جنم دیتا ہے ۔ اور نتیجہ پھر معاشرے کے زوال کی صورت میں نکلتا ہے۔
اس کے چہرے پہ مسکراہٹ اور حزن کی ملی جلی کیفیات ہیں۔ ایک دکھ ان حالات کا جو وطن پہ اور اس پہ گزرے۔۔۔ ایک مسکراہٹ اس زندگی کی جو وہاں خوشیوں کے ہنڈولے میں گزری۔
ایک غم کی بدلی موجودہ سماجی اور سیاسی ماحول کی اور ایک اطمینان ان خوش خبریوں پہ جو اگرچہ کبھی کبھی سننے کو ملتی ہیں لیکن الحمدللہ ابھی بھی ملتی ہیں۔(@محمداحمد بھائی، @محمد تابش صدیقی ، @سیما علی اور مجھ ناچیز کو پاکستان میں دیکھ کر بھی
)
ایک پریشانی ان خدشات پہ جو مستقبل کے حوالے سے ڈراتے ہیں اور ایک تبسم ان خوابوں کی تعبیر کے لیے جو شاعر کی طرح ہر محب وطن پاکستانی کے دل میں ہیں۔
الحمدللّٰہ ! میں کبھی مایوس نہیں ہوتا ۔ بہت زیادہ آپٹی مسٹ ہوں ۔ اس کا اردو متبادل قلم پر نہیں آرہا ۔ اللّٰہ کریم پاکستان کو ضرور اندھیروں سے نکالیں گے ۔ پچھلے چند سالوں میں امید کی نئی کرنیں پھوٹتی نظر آئی ہیں ۔ نئی نسل ( کہ جسے جین زی کہا جارہا ہے) سے بہت امیدیں ہیں ۔ اللّٰہ کرے تمام پرانے کھوسٹ مفاد پرست سیاستدان جلد ازجلد منظر نامے سے رخصت ہوں اور پڑھی لکھی حقیقت پسند عمل پرست قیادت سامنے آئے ۔
اس میں کوئی شک نہیں کہ سرزمینِ ہجرت یعنی امریکا (یا یورپ) نے ہم مہاجرین اوران کے توسط سے پاکستان کو بہت کچھ دیا ہے ۔ بنظرِ انصاف دیکھا جائے تو پاکستان کے زرِ مبادلہ کا اچھا خاصا حصہ تارکینِ وطن کے توسط سے آتا ہے ۔پاکستان میں کتنے ہی گھرانے ، رفاہی ادارے ، ہسپتال وغیرہ اس توسط سے چل رہے ہیں ۔ لیکن پاکستان کو اصل ضرورت اس افرادی قوت کی ہے جو ترقی یافتہ ممالک سے تعلیم و تربیت یافتہ ہے ۔ یہ لوگ اپنی صلاحیتوں کو مختلف شعبوں میں ترقی کے لیے استعمال کرسکتے ہیں لیکن کوشش اور نیک نیتی کے باوجود انہیں اس قسم کا کوئی موقع نہیں دیا جاتا ۔ وجہ وہی کرپشن یعنی اقربا پروری اور رشوت خوری ۔ ان باتوں کا میں ذاتی طور پر گواہ ہوں۔
رہی بات آپ بھائیوں اور بہنوں کی تو اس میں کوئی شک نہیں کہ آپ لوگوں کا وجود ہی مستقبل سے مایوس نہیں ہونے دیتا ۔ اللّٰہ کریم آپ سب کو شاد و آباد رکھے ۔ ہر قدم خوشیاں نصیب فرمائے ۔ آمین ۔