کس کس کا نام لے لے کر شکریہ ادا کروں؟
عرصہ ہوا کہ شاعری تقریباً چھٹ گئی۔ ان دنوں تو صرف محفل میں زندہ نظر آنے کے لیے پرانی غزلیں اٹھا اٹھا کے چپکاتا رہتا ہوں۔
مگر سچی بات بتاؤں؟ اتنی محبتیں پا کر جی چاہتا ہے کاش میں اب بھی شعر کہہ سکتا۔ کتنا آسان راستہ ہے یہ پیار پانے کا۔ میٹھا بولا، میٹھا سن لیا۔ بہرحال، ہمارے حال سے کوئی اور سیکھ لے تو بھی رائیگانی کا غم تو نہ رہے گا۔
دیکھو مجھے جو دیدۂِ عبرت نگاہ ہو---
میری سنو جو گوشِ نصیحت نیوش ہو!
جہاں تک تعلق ہے بابائے تحریف جناب
محمد خلیل الرحمٰن صاحب دامت برکاتہ کی پیروڈی کا، تو مجھے بے شک کوئی مریض سمجھے مگر حق یہ ہے کہ حسرت رہتی ہے کہ یہ ہماری غزلوں کو چیرا پھاڑا کریں۔ میں اتنا اذیت پسند تھا نہیں، خلیل صاحب کی جفاؤں کا مزا اور ہے۔ جس تن لگیاں اوہ تن جانے۔ بہت بہت شکریہ، مشفقی!
ابن رضا بھائی نے جو تیور پچھلے کچھ عرصے میں دکھانے شروع کیے ہیں، لگتا نہیں کہ دم لیں گے یا لینے دیں گے۔ سچ کہوں تو غزل گئی بھاڑ میں۔ پیروڈی پڑھا کرے بیٹھ کے کوئی رضا بھائی کی۔ جی خوش ہو گیا، واللہ!
پھر
عباد اللہ کیسے پیچھے رہتا۔ غلو تو انتہا درجے کا فرمایا مگر کوئی دیکھے کہ کل کے بچہ شعر کیسے کیسے نکالتا ہے۔ اللہ کرے زورِ قلم اور زیادہ!
رہے
مزمل حسین صاحب، تو ان کا شکریہ ممکن نہیں۔ محبتیں جب ایک حد سے بڑھ جائیں تو ظاہر کی آنکھ سے تماشا ہوتا ہی نہیں۔ کیا کریں؟
