ایک تازہ غزل - منیب احمد فاتح

منیب احمد فاتح — مئی 20، 2013 7:04 شام

ایک تازہ غزل پیش ہے۔ جی کھول کر تنقید کریں تاکہ معائب و محاسن سامنے آ سکیں۔ عرض کیا ہے:

کسے فراغ پریشانئ عدو کے لئے

بہت ہے حلقہِ احباب ہاؤ ہو کے لئے

حسد سے مانگتی پھرتی ہے چشم رو بفرار

شکستگی تمکنتِ حسنِ خوب رو کے لئے

زشہرِ سنگ پرستاں ہوں داد خواہِ جنوں

شکستِ شیشہِ پندارِ آبرو کے لئے

سخن طرازئ فاتح ہے پاسِ اہلِ ہنر

مقامِ نقد نہیں خوئے عیب جو کے لئے

(ق)

اڑی جو دشت میں بادِ خزاں بھبوکے لئے

تو آ کے بوسے مری چشمِ بے وضو کے لئے

کہا یہ میں نے کہ مت چھیڑ فکرمندِ بہار!

کہ ہم بھی بیٹھے ہیں کچھ داغ آرزو کے لئے

ذرا متابعِ جوشِ جنوں تو ہوں کہ چلیں

ہزار خار سہی پائے جستجو کے لئے

شوکت پرویز — مئی 22، 2013 11:32 صبح

منیب احمد فاتح نے کہا:
حسد سے مانگتی پھرتی ہے چشم رو بفرار
شکستگی تمکنتِ حسنِ خوب رو کے لئے

شکستگی میں "ت" بھی تقطیع میں شمار ہو گی، یہ تائے فارسی نہیں ہے۔۔۔ اور اس وجہ سے درج بالا شعر وزن سے خارج ہو رہا ہے۔۔۔

منیب احمد فاتح — مئی 22، 2013 3:23 شام

شوکت پرویز نے کہا:
شکستگی میں "ت" بھی تقطیع میں شمار ہو گی، یہ تائے فارسی نہیں ہے۔۔۔ اور اس وجہ سے درج بالا شعر وزن سے خارج ہو رہا ہے۔۔۔

صحیح کہا، شکریہ!

مدیحہ گیلانی — مئی 22، 2013 7:35 شام

واہ واہ !
خوب غزل کہی آپ نے منیب میاں ۔
جیتے رہیں بیٹا اللہ کرے زور قلم اور زیادہ۔

الف عین — مئی 23، 2013 4:20 صبح

خوب غزل ہے، بس وہی شکستگی ہی شکستہ ہے

منیب احمد فاتح — مئی 24، 2013 3:40 صبح

الف عین نے کہا:
خوب غزل ہے، بس وہی شکستگی ہی شکستہ ہے

ہاں جی، اس کو دیکھتا ہوں۔

منیب احمد فاتح — مئی 24، 2013 3:41 صبح

مدیحہ گیلانی نے کہا:
واہ واہ !
خوب غزل کہی آپ نے منیب میاں ۔
جیتے رہیں بیٹا اللہ کرے زور قلم اور زیادہ۔

آمین!

محتشم سلمان — جون 1، 2013 4:55 صبح

حضور حضور حضور! حد ہوتی ہے کسی شے کی بھی۔ عمر بیس برس آپ کی اور کلام دیکھئے۔۔۔ سبحان اللہ! ایک ایک شعر پر بجائے واہ آہ نکلتی ہے:

زشہر سنگ پرستاں ہوں داد خواہ جنوں

شکست شیشہ پندار آبرو کے لئے

اللہ اللہ! اور وہ جو ایک شعر آپ کا غلط ہوا تو مجھے تسلی ہوئی کہ یہ کلام آپ ہی کا ہے۔

اور قطعہ دیکھئے، کیا ہی نقشہ آنکھوں میں گھما دیا آپ نے۔ ماشاءاللہ!

میں نے تو دوسری ہی غزل آپ کی دیکھی ہے اور معتقد ہو گیا ہوں۔ آپ تو میرے ہی شہر میں رہتے ہیں۔ کوئی ملاقات کیجئے۔

محمداحمد — جون 3، 2013 9:23 صبح

زشہرِ سنگ پرستاں ہوں داد خواہِ جنوں
شکستِ شیشہِ پندارِ آبرو کے لئے
واہ واہ واہ
بہت عمدہ کلام ہے۔

منیب احمد فاتح — جون 4، 2013 1:18 صبح

محمداحمد نے کہا:
زشہرِ سنگ پرستاں ہوں داد خواہِ جنوں
شکستِ شیشہِ پندارِ آبرو کے لئے
واہ واہ واہ
بہت عمدہ کلام ہے۔

نہایت شکرگزار ہوں۔

منیب احمد فاتح — جون 4، 2013 1:21 صبح

محتشم سلمان نے کہا:
حضور حضور حضور! حد ہوتی ہے کسی شے کی بھی۔ عمر بیس برس آپ کی اور کلام دیکھئے۔۔۔ سبحان اللہ! ایک ایک شعر پر بجائے واہ آہ نکلتی ہے:

زشہر سنگ پرستاں ہوں داد خواہ جنوں
شکست شیشہ پندار آبرو کے لئے
اللہ اللہ! اور وہ جو ایک شعر آپ کا غلط ہوا تو مجھے تسلی ہوئی کہ یہ کلام آپ ہی کا ہے۔
اور قطعہ دیکھئے، کیا ہی نقشہ آنکھوں میں گھما دیا آپ نے۔ ماشاءاللہ!
میں نے تو دوسری ہی غزل آپ کی دیکھی ہے اور معتقد ہو گیا ہوں۔ آپ تو میرے ہی شہر میں رہتے ہیں۔ کوئی ملاقات کیجئے۔

جناب معتقد بھی ہو گئے آپ!!!
جی ضرور، چند دن میں یونیورسٹی کے ایگزیمز سے فارغ ہو جاؤں گا۔ پھر آپ سے ملاقات یقینی۔

محتشم سلمان — جون 4، 2013 11:38 صبح

بہت نوازش۔