ایک غزل - اس کے کردار کی اس کے گفتار کی

کاشف اسرار احمد — مئی 22، 2016 10:33 صبح

ایک تازہ غزل پیش کر رہا ہوں۔
تمام احباب کی رائے ، تنقید اور تبصروں کا منتظر رہونگا !
★★★★★★★★★★★★★★★★★★
اُس کے کردار کی اُس کے گفتار کی !
دل میں چبھتی رہی نوک تلوار کی !
آؤ باتیں کریں ، خوب ہنس کر ملیں
کچھ طبیعت ہو آسودہ غمخوار کی !
تلخ یادوں کے دریا سے آگے بڑھے
ہم نے رَو پار کی غم کے مُنجدھار کی !

اب تو برسوں کی دوری پہ ہیں گھر سے ہم
کچھ خبر ہی نہیں یار اغیار کی !

مستقل دے رہا ہے خبر دیس کی
برکتیں عمر میں ہوں اس اخبار کی !

تنگدستی میں دل چاہتا ہے کہ ہم
گھر اٹھا لائیں ہر چیز بازار کی !

سلسلے گمشدہ قوم سے ہیں مرے
اب سند کیا دوں میں اپنے کردار کی !

جس رفاقت کی کاشف یہ تصویر ہے
ان سرابوں سے پسپائی اقرار کی !
سیّد کاشف
★★★★★★★★★★★★★★★★★★

محمد تابش صدیقی — مئی 22، 2016 11:21 صبح

واہ کاشف بھائی بہت خوب

کاشف اسرار احمد نے کہا:
سلسلے گمشدہ قوم سے ہیں مرے
اب سند کیا دوں میں اپنے کردار کی !

کس عمدگی سے کرب کو بیان کیا ہے.

محمد تابش صدیقی — مئی 22، 2016 11:21 صبح

عنوان میں کردار کے بعد الف زائد ہے. درست کر لیں.

الف عین — مئی 22، 2016 9:03 شام

اچھی غزل ہے لیکن گفتار مؤنث ہے۔ ’اس کی گفتار‘ہونا چاہئے تھا

کاشف اسرار احمد — مئی 23، 2016 10:58 صبح

الف عین نے کہا:
اچھی غزل ہے لیکن گفتار مؤنث ہے۔ ’اس کی گفتار‘ہونا چاہئے تھا

بہت بہتر استاد محترم.
لیکن اب تدوین کا لنک ختم ہو گیا ہے

عباد اللہ — مئی 23، 2016 12:18 شام

واہ
بہت عمدہ غزل ہے

کاشف اسرار احمد — مئی 23، 2016 3:03 شام

محمد تابش صدیقی نے کہا:
عنوان میں کردار کے بعد الف زائد ہے. درست کر لیں.

تابش بھائی میرے لیپ ٹاپ پر تو درست دکھا رہا ہے !

کاشف اسرار احمد — مئی 23، 2016 3:05 شام

مطلع اب یوں پڑھا جائے :
اُس کی گفتار کی، اُس کے کردار کی !
دل میں چبھتی رہی نوک تلوار کی !
شکریہ۔

محمد تابش صدیقی — مئی 23، 2016 3:17 شام

کاشف اسرار احمد نے کہا:
تابش بھائی میرے لیپ ٹاپ پر تو درست دکھا رہا ہے !

پہلے ایسا ہی تھا. اب درست ہے.