” دعا“
کمالِ فن کی طلب میں کہاں کہاں دیکھا
ہر اک زمین کو چوما ، ہر آسماں دیکھا
مرے رفیق ، مرے محترم ، مرے محرم
وہاں وہاں تجھے پایا ، جہاں جہاں دیکھا
مری زبان کی لکنت کہ کچھ نہ مانگ سکا
ترا کرم کہ تجھے اپنا رازداں دیکھا
مرے خدا ، مرے مالک ، مرے غفور و رحیم
تو مجھ میں ہے ، تجھے میں نے محیطِ جاں دیکھا
مرے خدا یہاں اپنوں کی بادشاہی میں
جلا ہوا ترے مزدور کا مکاں دیکھا
لرزتے ہاتھ بھی ، افسر کے پاو¿ں بھی دیکھے
لجاجتوں کے عوض قہرِ بے اماں دیکھا
امیرِ شہر کو دیکھا کہ مست و بے خود ہے
غریب لوگ رہے بر سرِ سناں دیکھا
نشہ غرور کا اہلِ ستم کی آنکھوں میں
سروں پہ طاقت و دولت کا سائباں دیکھا
تری قسم تری جنت نگاہ دھرتی میں
چراغ چہروں پہ پھیلا ہوا دھواں دیکھا
تو مقتدر ہے خدایا یہ التجا سن لے
کسی کو بھی نہ دکھانا جو ہے یہاں دیکھا
مرے خدا مری سن لے کہ آج تک میں نے
ترے بغیر نہیں کوئی آستاں دیکھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منیر انور