دراصل جِس کا عکس ہے یہ ساری کائنات

اُس نے اُٹھا کے پھینک دیا چاک سے پرے
کچھ بن رہا ہوں اور ہی اب خاک سے پرے
کچھ اور بات ہے سرِ اوراقِ زندگی
اور بات کوئی اور ہے اوراق سے پرے
اِک روز میں بھی تو تُجھے حیرت زدہ کروں
اِک روز لے کے جا مُجھے اِدراک سے پرے
دراصل جِس کا عکس ہے یہ ساری کائنات
رکھا ہوا ہے آئینہ افلاک سے پرے
دِل مُبتِلا ہے عارضہءلا علاج میں
پر ایک ترا لمس ہے تریاق سے پرے
کب سے زمیں اُٹھائے ہوئے چل رہا ہوں میں
لیکن ابھی گیا نہیں آفاق سے پرے
ش زاد

دراصل جِس کا عکس ہے یہ ساری کائنات
رکھا ہوا ہے آئینہ افلاک سے پرے
بہت خوب!

اچھی غزل ہے ش زاد، لیکن یہ قاف اور کاف کے قوافی پسند نہیں آئے، صوتی قوافی بھی تو نہیں!!

بہت خوب محترم ش زاد صاحب
اِک روز میں بھی تو تُجھے حیرت زدہ کروں
اِک روز لے کے جا مُجھے اِدراک سے پرے

خوب غزل ہے جناب اور میں اعجاز صاحب سے متفق ہوں۔