عشق میں پہلے ڈرتے تھے بربادی سے ۔۔ آصف شفیع

احبابِ محفل! آداب، آج کل محفل میں خاموشی کیوں ہے؟ بہت کم لوگ اپنا کلام پوسٹ کر رہے ہیں۔ کیا سب مصروف ہو گئے ہیں؟ چلیں اس خاموشی کو توڑتے ہیں اور میں اپنی کتاب " کوئی پھول دل میں کھلا نہیں" سے ایک غزل پیش کرتا ہوں۔
عشق میں پہلے ڈرتے تھے بربادی سے
ہوتے ہوتے ہو گئے ہیں اب عادی سے
پیار کہانی سننے والے ! یہ تو بتا
شہزادہ کیا بولا تھا شہزادی سے
کتنی آہیں اس کے لب پر لرزاں ہیں
کچھ تو پوچھو اپنے اس فریادی سے
کنجِ قفس سے آنے جانے والوں کو
گھومتے پھرتے دیکھتا ہوں آزادی سے
آپس میں مل جل کر رہنے والے لوگ
اک دن دور نکل آئے آبادی سے
دنیا کی رنگینی کو مت دیکھ آصف
اندازہ کر اس کی بے بنیادی سے
آصف شفیع

واہ بہت خوبصورت غزل ہے آصف صاحب، لاجواب!

بہت خوبصورت غزل ہے۔ آصف صاحب۔ بہت شکریہ

یہ تو کوئی بات ہی نہیں ہوئی۔ آصف یہاں ایک غزل پوسٹ کر کے گئے اور کسی نے پذیرائی ہی نہیں کی؟ میں نے بھی صرف شکریے کا بٹن دبا دیا تھا کہ کچھ بعد میں لکھوں گا۔ الفاظ کی اتنی کنجوسی کیوں؟

عشق میں پہلے ڈرتے تھے بربادی سے
ہوتے ہوتے ہو گئے ہیں اب عادی سے
اچھا شعر ہے، نفسیاتی تجزئے کی مثال
پیار کہانی سننے والے ! یہ تو بتا
شہزادہ کیا بولا تھا شہزادی سے
یہاں ’بولا‘ کچھ اچھا نہیں لگ رہا، بمبئیا زبان لگ رہی ہے۔ ’کہتا‘ کہنے میں کیا حرج ہے؟
آپس میں مل جل کر رہنے والے لوگ
اک دن دور نکل آئے آبادی سے
واہ، اچھی بات کہی ہے۔
دنیا کی رنگینی کو مت دیکھ آصف
اندازہ کر اس کی بے بنیادی سے
مقطع سمجھ میں نہیں آیا آصف۔ بے بنیادی کا اس سے تعلق؟

سبحان اللہ! خوبصورت غزل شریکِ محفل کرنے پر شکریہ۔ مزید لب کشائی کی استطاعت نہیں پاتا۔

تمام احباب کا شکریہ۔ خاص طور پر اعجاز صاحب کا جنہوں نے کچھ اشعار پر اپنی رائے دی ہے۔ امید ہے باقی احباب بھی رائے سے نوازیں گے

بہت خوب ، ماشا اللہ ، کیا خوب کلام ہے ، بہت شکریہ آصف شفیع صاحب، پیش کرنے پر، بہت شکریہ

شکریہ مغل صاحب۔ ۔ ۔!

سر آنکھوں پر جناب

بہت خوب لاجواب

بہت شکریہ ، راجا صاحب!

ہمم تو احمد انکل بھی آگئے ہیں ۔۔ گڈ