غزل: تم بھی عینِ خمار ہو گئی ہو

مہدی نقوی حجاز — فروری 9، 2014 6:43 شام

تازہ غزل:
تم بھی عینِ خمار ہو گئی ہو
میرے سر پر سوار ہو گئی ہو
ہاں، مرا اعتبار کوئی نہیں
تم مرا اعتبار ہو گئی ہو
کیا عجب کوئی رہ گزر ہو وہاں
دل سے تم آر پار ہو گئی ہو
اب میں سمجھا کہ صرف میں ہی نہیں
تم بھی میں کا شکار ہو گئی ہو
چھین کر میرا پیار مجھ سے تم
خود بھی میرا ادھار ہو گئی ہو
جب سے میں ہو گیا ہوں خاموشی
تم مجسم پکار ہو گئی ہو
میری تاریخ کی تو جیسے تم
جانِ عالم فگار ہو گئی ہو
ایک ہی بار تو ہوئی ہو مری
کونسا بار بار ہو گئی ہو
تم غزل ہو حجازؔ کی لیکن
تم بہت شاہکار ہو گئی
مہدی نقوی حجازؔ

الف عین — فروری 10، 2014 2:42 صبح

ایسی غزلں سنا سنا کے ہمیں
خود بھی سر پر سوار ہو گئے ہو

مہدی نقوی حجاز — فروری 10، 2014 10:03 صبح

الف عین نے کہا:
ایسی غزلں سنا سنا کے ہمیں
خود بھی سر پر سوار ہو گئے ہو

ہم ایسی گستاخی کیوں کریں گے بھلا!؟َ

ظفری — فروری 10، 2014 10:06 صبح

ایک ہی بار تو ہوئی ہو مری
کونسا بار بار ہو گئی ہو
واہ بہت خوب برخوردار ۔ مجھے تو جون ایلیا کی روح تم میں نظر آرہی ہے ۔

مہدی نقوی حجاز — فروری 10، 2014 10:11 صبح

کچھ مزید شعر:
راستہ ڈھونڈتے ہوئے میرا
تم اسی کا غبار ہو گئی ہو
آگ تھی، پھر ہری بھری ہو گئی
کیا تم اب سبزہ زار ہو گئی ہو
پھول تھی، میں تھا خار، اور اب تم
خار کے ساتھ خار ہو گئی ہو
منحصر تو نہیں ہوئی ہو تم
ہاں مگر انحصار ہو گئی ہو
سچ بتانا کہ قصہ گو ہی ہو
یا فسانہ نگار ہو گئی ہو
مجھ کو لُوٹے، ہوئے ہیں کچھ دن اور
میرا دار و مدار ہو گئی ہو
سبز راتوں میں نیلگوں بارش
اور سرخ آبشار ہو گئی ہو

ظفری — فروری 10، 2014 10:12 صبح

آگ تھی، پھر ہری بھری ہو گئی
کیا تم اب سبزہ زار ہو گئی ہو
کمال کا مشاہدہ ہے بھئی ۔

مہدی نقوی حجاز — فروری 10، 2014 10:14 صبح

ظفری نے کہا:
ایک ہی بار تو ہوئی ہو مری
کونسا بار بار ہو گئی ہو
واہ بہت خوب برخوردار ۔ مجھے تو جون ایلیا کی روح تم میں نظر آرہی ہے ۔

حضورِ والیٰ جون سے مجھے بہت لگاؤ اور محبت ہے، محبت رنگ تو لاتی ہے نا!

چاہے آپ لاکھ کوشش کیجیے کہ دور رہیں، میرا ایک شعر تھا اس بارے کہ:
جو اتاروں تو مرے منہ سے اترتا بھی نہیں
ترا لہجہ بھی ہو گویا مری موٹی چمڑی