نہ جنوں میں تشنگی ہے، نہ وصال ِ عاشقانہ

نہ جنوں میں تشنگی ہے، نہ وصال ِ عاشقانہ
میری زندگی کا شاید، یہیں تھم گیا زمانہ
نہ صدا ہے محرموں کی، نہ نظر وہ ساحرانہ
نہ وفا ہے دوستوں کی، نہ عطائے دلبرانہ
میرے ہجر کے فسانے ہیں مکاں سے لا مکاں تک
نہ چمن نہ گل نہ بلبل نہ بہار و آب و دانہ
میرے غم کدے کی شامیں ہیں تیرے بنا غریباں
ہے مزاج ِ شب بھی کافر تیرا غم بھی قاتلانہ
میں جو تھک گیا سفر میں میرے آبلوں نے چھیڑا
وہی راگ ِ دشت و صحرا بہ نوائے تازیانہ
یہ منافقت کی بستی ھے کہ دور مصلحت کا
جو نقاب ِ زرق اوڑھے ھے جہان ِ کافرانہ
پس مرگ خامشی یہ ھے حلیف ِ دست ِ ظلمت
تری چپ ھے تیری قاتل کہ مزاج ِ بذدلانہ
میرے طرز ِ حق نوائی پہ ہے اعتراض ان کو
جو صدائے عاشقاں کو کہیں فقر ِمشرکانہ
یہ کمال ِ د ل فریبی ہے ترے سخن میں درویش
جو فقیر بن کے چھیڑا ہے رباب ِ خسروانہ
فاروق درویش

شاعر کا نام؟

برادرعارف شاعر کا نام تخلص میں لکھا ھے ۔۔۔۔۔۔۔۔۔۔۔۔۔ اب نیچے بھی لکھ دیا گیا ہے، بندہ ہ ء فقیر فاروق درویش

ماشاءاللہ بہت خوب سر۔۔۔ بہت اچھی غزل ہے۔۔

جزاک اللہ برادر محمد امین صاحب، ممنون ھوں محبتوں کا ۔۔۔۔۔ جگ جگ جئیں حضور

ایک اچھے شاعر کی آمد پر مبارک۔

بہت خوبصورت غزل ہوئی سر، پانچواں شعر اور مقطع بہت ہی خوب ہے، پہلے بھی پڑھ چکی ہوں یہ غزل لیکن ہر دفعہ لطت دیتی ہے۔ جو فقیر بن کے چھیرا ہے رباب ِ خسروانہ، کمال مصرع ہےْ مولیٰ آپ کو صحت اور لمبی زندگی دے۔ آمین

خوب غزل کہی آپ نے فاروق صاحب۔

سدا خوش آباد و خوش مراد برادرم محمد وارث صاحب ۔۔۔۔۔۔۔۔۔۔۔۔ ممنون ھوں محبتوں کا ۔۔۔۔۔۔۔

کل ہم کچھ ایسے مصروف تھے کہ یہ خوبصورت سی چیز ہم سے رہ گئی تھی۔

جزاک اللہ برادر محترم ابن ِ سعید صاحب ۔۔۔۔۔۔۔۔۔۔۔۔۔۔۔۔۔۔۔۔ ان محبتوں اور حوصلہ افزائی کیلئے ممنون ھوں ۔۔۔۔۔۔۔۔۔۔۔۔۔خوش آباد

واہ صاحب!! کیا مقطع ہے واللہ