وہ کسی کا میری جانب مسکرا کر دیکھنا-----مزمل شیخ بسملؔ

مزمل شیخ بسمل — مئی 23، 2013 7:15 شام

ایک غیر طرحی مشاعرے میں لکھی گئی غزل۔ قارئین کی نذر۔

غزل

اشکِ شبنم سے مجھے نرگس کا رو کر دیکھنا

بعد مُردن تم مری تربت پہ آ کر دیکھنا

پاؤ گے گل کاریِ خنجر سراسر دیکھنا

زخمِ دل کا تم ذرا پھاہا چھٹا کر دیکھنا

رنگ لائے گی فغاں کیا سر پہ چھا کر دیکھنا

کھا ئے گا یہ آسماں چکر پہ چکر دیکھنا

ایک مشکل دونوں جانب ہے برابر دیکھنا

سخت جانی پر مری یہ کند خنجر دیکھنا

میری مِٹّی کا تو اک ذرّہ بھی ہے تربت مری

اپنے ہاتھوں سے مری تربت مٹا کر دیکھنا

حسرت و ارماں کی یارب خیر تیرے ہاتھ ہے

روز حملے کر رہا ہے غم کا لشکر دیکھنا

نزع کے آنسو میں ڈوبی کشتیِ عمرِ رواں

ایک قطرہ ہوگیا بڑھ کر سمندر دیکھنا

کر گئی برباد ترکِ آرزو کی جستجو

وہ کسی کا میری جانب مسکرا کر دیکھنا

عشق کی سوزش سے بسملؔ خاک ہو جائے گا سب

میری تربت پر ذرا سبزہ اُگا کر دیکھنا

فارقلیط رحمانی — مئی 23، 2013 7:28 شام

اشکِ شبنم سے مجھے نرگس کا رو کر دیکھنا
بعد مُردن تم مری تربت پہ آ کر دیکھنا
یہ غالباً ٹائپنگ کی غلطی ہے۔

محمد اسامہ سَرسَری — مئی 23، 2013 7:32 شام

ماشاءاللہ بہت خوب لکھی ہے۔

یہ شعر بہت پسند آیا:

میری مِٹّی کا تو اک ذرّہ بھی ہے تربت مری

اپنے ہاتھوں سے مری تربت مٹا کر دیکھنا

مطلع اول میں دونوں قافیے حرفِ روی کی مطابقت سے خالی لگ رہے ہیں، کیا یہ بات درست ہے؟

محض اپنی اصلاح کی خاطر یہ سوال کر رہا ہوں۔

مزمل شیخ بسمل — مئی 23، 2013 7:35 شام

فارقلیط رحمانی نے کہا:
اشکِ شبنم سے مجھے نرگس کا رو کر دیکھنا
بعد مُردن تم مری تربت پہ آ کر دیکھنا
یہ غالباً ٹائپنگ کی غلطی ہے۔

مجھے تو کچھ غلط نہیں لگا اس میں۔ وضاحت فرمائیں تو شکر گذار رہوں۔

فارقلیط رحمانی — مئی 23، 2013 7:37 شام

نرگس کا صحیح املا کیا ہے؟
ن+ ر + گ + ھ + س
یا
ن+ ر + گ + س

فارقلیط رحمانی — مئی 23، 2013 7:38 شام

مزمل شیخ بسمل نے کہا:
مجھے تو کچھ غلط نہیں لگا اس میں۔ وضاحت فرمائیں تو شکر گذار رہوں۔

نرگس کا صحیح املا کیا ہے؟

ن+ ر + گ + ھ + س

یا

ن+ ر + گ + س

مزمل شیخ بسمل — مئی 23، 2013 7:39 شام

محمد اسامہ سَرسَری نے کہا:
ماشاءاللہ بہت خوب لکھی ہے۔
یہ شعر بہت پسند آیا:
میری مِٹّی کا تو اک ذرّہ بھی ہے تربت مری
اپنے ہاتھوں سے مری تربت مٹا کر دیکھنا
مطلع اول میں دونوں قافیے حرفِ روی کی مطابقت سے خالی لگ رہے ہیں، کیا یہ بات درست ہے؟
محض اپنی اصلاح کی خاطر یہ سوال کر رہا ہوں۔

اچھا پکڑا ہے صاحب۔
ویسے یہ بات میرے ذہن میں تھی۔ مگر بات یہ ہے کہ اگر محض ایک ہی مطلع ہوتا تو یہ چیز قابل گرفت ہو جاتی۔ مگر مطلعوں کی بندش آگے تک ہے۔ اور اگلے مطلعوں میں مکمل صراحت ہے۔

مزمل شیخ بسمل — مئی 23، 2013 7:42 شام

فارقلیط رحمانی نے کہا:
نرگس کا صحیح املا کیا ہے؟
ن+ ر + گ + ھ + س
یا
ن+ ر + گ + س

میرے ناچیز علم میں تو نرگس ہی ہے۔
ن + ر + گ + س

محمد اسامہ سَرسَری — مئی 24، 2013 8:45 شام

مزمل شیخ بسمل نے کہا:
میرے ناچیز علم میں تو نرگس ہی ہے۔
ن + ر + گ + س

ن + ر + گ + س؟
یا
ن + ر + گھ + س؟

محمد اسامہ سَرسَری — مئی 24، 2013 8:49 شام

مزمل شیخ بسمل نے کہا:
اچھا پکڑا ہے صاحب۔
ویسے یہ بات میرے ذہن میں تھی۔ مگر بات یہ ہے کہ اگر محض ایک ہی مطلع ہوتا تو یہ چیز قابل گرفت ہو جاتی۔ مگر مطلعوں کی بندش آگے تک ہے۔ اور اگلے مطلعوں میں مکمل صراحت ہے۔

یہ جواب آپ پر ادھار ہے صاحب!

مزمل شیخ بسمل نے کہا:
سوال: حرف روی کی جامع اور مانع تعریف کیا ہے؟
جواب: اس سوال کا جواب خاصہ تفصیل طلب ہے تو فراغت کے لیئے بچاتا ہوں

مزمل شیخ بسمل — مئی 25، 2013 6:36 صبح

محمد اسامہ سَرسَری نے کہا:
ن + ر + گ + س؟
یا
ن + ر + گھ + س؟

سرخ :: غلط
نیلا :: درست۔

مزمل شیخ بسمل — مئی 25، 2013 7:40 صبح

محمد اسامہ سَرسَری نے کہا:
یہ جواب آپ پر ادھار ہے صاحب!

جی مجھے یاد ہے اسامہ۔ انشا اللہ۔ جلد ہی۔۔۔

میر انیس — مئی 25، 2013 8:01 صبح

نزع کے آنسو میں ڈوبی کشتیِ عمرِ رواں

ایک قطرہ ہوگیا بڑھ کر سمندر دیکھنا

ماشاللہ مزمل ۔ اللہ تمہاری سوچ کو اور بلند کرے۔

فارقلیط رحمانی نے کہا:
نرگس کا صحیح املا کیا ہے؟
ن+ ر + گ + ھ + س
یا
ن+ ر + گ + س

بھائی میں نے نرگھس تو کہیں نہیں پڑھا اصل لفظ نرگس ہی ہوتا ہے۔
ہزاروں سال نرگس اپنی بے نوری پہ روتی ہے۔

مزمل شیخ بسمل — مئی 25، 2013 8:13 صبح

میر انیس نے کہا:
نزع کے آنسو میں ڈوبی کشتیِ عمرِ رواں
ایک قطرہ ہوگیا بڑھ کر سمندر دیکھنا
ماشاللہ مزمل ۔ اللہ تمہاری سوچ کو اور بلند کرے۔

بھائی میں نے نرگھس تو کہیں نہیں پڑھا اصل لفظ نرگس ہی ہوتا ہے۔
ہزاروں سال نرگس اپنی بے نوری پہ روتی ہے۔

آمین۔
شکریہ محترم۔

الف عین — مئی 25، 2013 9:36 صبح

مطلع میں ایطا کا سقم اس طرح دور کر دیں کہ اسے مطلع چہارم بنا دیں، آخر میں تقابل ردیفین کا عیب ہو گا، ایطا نہیں۔
اور رہا سوال نرگس کا، تو یہ جمیل نوری نستعلیق کی لگیچر کی غلطی ہے۔ اگر ڈفالٹ تھیم بدل کر دیکھیں تو درست نظر آ جائے گا۔ یا یہیں سے کاپی پیسٹ کر کے علوی یا کسی اور فانٹ میں دیکھیں۔ کہا جاتا ہے کہ یہ پرانے ورژن میں غلطی تھی۔ لیکن میں نے جدید ترین ورژن اتارا، تب بھی افاقہ نہیں ہوا ہے۔

فارقلیط رحمانی — مئی 25، 2013 3:47 شام

مزمل شیخ بسمل نے کہا:
آمین۔
شکریہ محترم۔

فارقلیط رحمانی — مئی 25، 2013 3:50 شام

السلام علیکم ورحمۃ اللہ وبرکاتہ
برادر مزمل شیخ بسمل صاحب
نہ آپ غلط ہیں، نہ ہم۔
دراصل ہمارے سسٹم میں کوئی مسئلہ درپیش ہے جس کی وجہ سے نرگ+س لکھا جائے تب بھی وہ ہماری سسٹم میں نرگس ہی دکھائی دیتا ہے۔
آئی۔ ٹی۔ والے محفلین ملاحظہ فرمائیں اور اس مسئلہ کا کوئی مناسب حل بتائیں۔

مزمل شیخ بسمل — مئی 25، 2013 5:17 شام

فارقلیط رحمانی نے کہا:
السلام علیکم ورحمۃ اللہ وبرکاتہ
برادر مزمل شیخ بسمل صاحب
نہ آپ غلط ہیں، نہ ہم۔
دراصل ہمارے سسٹم میں کوئی مسئلہ درپیش ہے جس کی وجہ سے نرگ+س لکھا جائے تب بھی وہ ہماری سسٹم میں نرگس ہی دکھائی دیتا ہے۔
آئی۔ ٹی۔ والے محفلین ملاحظہ فرمائیں اور اس مسئلہ کا کوئی مناسب حل بتائیں۔

میرے خیال میں آپ پاک اردو انسٹالر انسٹال کرلیں تو یہ پریشانی رفع ہوجائیگی۔

فارقلیط رحمانی — مئی 25، 2013 7:36 شام

مزمل شیخ بسمل نے کہا:
میرے خیال میں آپ پاک اردو انسٹالر انسٹال کرلیں تو یہ پریشانی رفع ہوجائیگی۔

ہمارے سسٹم میں پاک اردو انسٹالر سے ہی اردو انیبل کی گئی ہے۔

محمد اسامہ سَرسَری — مئی 25، 2013 8:01 شام

فارقلیط رحمانی نے کہا:
السلام علیکم ورحمۃ اللہ وبرکاتہ
برادر مزمل شیخ بسمل صاحب
نہ آپ غلط ہیں، نہ ہم۔
دراصل ہمارے سسٹم میں کوئی مسئلہ درپیش ہے جس کی وجہ سے نرگ+س لکھا جائے تب بھی وہ ہماری سسٹم میں نرگس ہی دکھائی دیتا ہے۔
آئی۔ ٹی۔ والے محفلین ملاحظہ فرمائیں اور اس مسئلہ کا کوئی مناسب حل بتائیں۔

اوہ۔۔۔! تو یہ چکر ہے۔
اب مجھے یاد آرہا ہے ایک دھاگے میں ہمارے محفل کے ایک شاعر (کاشف عمران کاؔمل)جنھیں کچھ ہی دنوں میں استاد بھی مان لیا گیا تھا، انھوں نے ایک دھاگے میں شاعری میں جدت پیدا کرنے کی سنجیدہ بحث چھیڑی تھی، پھر اس بات پر ناراض ہوگئے تھے کہ محفل کے کچھ ساتھیوں نے اتنے سنجیدہ دھاگے میں مذاق شروع کردیا ہے، جن باتوں کو انھوں نے مذاق سمجھ کر برا مانا تھا ان میں سے ایک یہ تھی کہ ان کے شعر میں لفظ نرگس(بغیر ھ) پر کسی نے نشاندہی کرنے کے لیے حیرت سے لکھا تھا: ”نرگھس!“ ، شاید وہاں بھی اشکال کرنے والے کو نرگس ھ کے ساتھ نظر آرہا ہوگا۔