برائے اصلاح: تم اس عید پر بھی نہ آؤ گی، ظالم؟

عاطف ملک — جون 26، 2017 12:05 صبح

ڈرتے ڈرتے اساتذہ کرام اور محفلین کی خدمت میں یہ تُک بندیاں پیش کرنے کی جسارت کر رہا ہوں۔
تنقیدی اور اصلاحی آراء کا منتظر ہوں۔

مسرت کے دن بھی رُلاو گی، ظالم؟
تم اس عید پر بھی نہ آؤ گی، ظالم؟
سنوارو گی کنگھے سے زلفوں کو اپنی
جبیں پر بھی بندیا سجاؤ گی، ظالم؟
لگاؤ گی آنکھوں میں کاجل کا ناوک
کمان اپنے ابرو بناؤ گی، ظالم؟
سجاؤ گی کانوں کو تم بالیوں سے
لبوں پر بھی سُرخی لگاؤ گی، ظالم؟
نکھارو گی رخسار غازہ لگا کر
قمر کو بھی شیشہ دکھاؤ گی، ظالم؟
صراحی سی گردن میں مالا پہن کر
مہا رانیوں کو جلاؤ گی، ظالم؟
کلائی سجاؤ گی تم چوڑیوں سے
ہتھیلی پہ مہندی رچاؤ گی، ظالم؟
تمہاری جدائی میں تڑپوں گا جب میں
بھلا کیسے تم مسکراؤ گی، ظالم؟
تمہارے لیے ساری دنیا کو چھوڑا
مجھے یوں ہی تم چھوڑ جاؤ گی ظالم؟
دکھا کر زمانے کو عاطف کا گریہ
جہاں میں تماشہ بناؤ گی، ظالم؟

ٹیگ نامہ:
استادِ محترم
محترم محمد وارث
محترم محمد ریحان قریشی

امان زرگر — جون 26، 2017 1:13 صبح

آہا. . . . . عید مبارک

محمد خلیل الرحمٰن — جون 26، 2017 1:41 صبح

بہت خوبصورت نظم ۔ بہت داد قبول فرمائیے
ہماری صلاح
آخری شعر میں معمولی سا ردو بدل فرمادیجیے
دکھا کر زمانے کو عاطف کا گریہ

جہاں میں تماشہ بناؤ نہ للہ

عاطف ملک — جون 26، 2017 4:12 صبح

امان زرگر نے کہا:
آہا. . . . . عید مبارک

آپ کو بھی بہت بہت عید مبارک امان اللہ بھائی!
دعاؤں میں یاد رکھیے گا

محمد خلیل الرحمٰن نے کہا:
بہت خوبصورت نظم ۔ بہت داد قبول فرمائیے
ہماری صلاح
آخری شعر میں معمولی سا ردو بدل فرمادیجیے
دکھا کر زمانے کو عاطف کا گریہ
جہاں میں تماشہ بناؤ نہ للہ

تو یہ نظم ہے؟؟؟

اور تقریباً درست بھی؟؟؟

آخری شعر کے حوالے سے آپ کا حکم سر آنکھوں پہ استادِ محترم

وسے ہی کر دیا

الف عین — جون 26، 2017 5:32 صبح

درست ہے غزل. ہو سکے تو اطلاع دینا کہ ظالم کا کیا جواب تھا!

عاطف ملک — جون 26، 2017 6:09 صبح

الف عین نے کہا:
درست ہے غزل.

الف عین نے کہا:
ہو سکے تو اطلاع دینا کہ ظالم کا کیا جواب تھا!

عید مبارک

محمد خلیل الرحمٰن — جون 26، 2017 6:48 صبح

تو یہ نظم ہے؟؟؟
اور تقریباً درست بھی؟؟؟
آخری شعر کے حوالے سے آپ کا حکم سر آنکھوں پہ استادِ محترم
وسے ہی کر دیا

استادِ محترم نے ہماری صلاح کو رد کردیا ہے چنانچہ صلاح واپس

عباد اللہ — جون 26، 2017 9:23 صبح

اتنے سوالات کر کے رلاؤ گے کیا

تفنن برطرف بہت عمدہ

محمد عدنان اکبری نقیبی — جون 26، 2017 10:09 صبح

یہ تو ظلم کی انتہا ہو گی۔

بہت عمدہ اور زبردست

طاہر راجپوت ملتان — جون 26، 2017 10:36 صبح

بہت ہی اعلی جی لاجوااب سخن اور کافیہ پیمائی کی
تمہارے لیےظالم؟ساری دنیا کو چھوڑا
مجھے یوں ہی تم چھوڑ جاؤ گی ظالم؟

لاریب مرزا — جون 26، 2017 11:44 صبح

میڈیکل کے instruments کے علاوہ خالصتاً خواتین کے زیرِ استعمال instruments سے بھی خوب آگاہی ہے آپ کو۔

خوب شاعری ہے۔ بہت سی داد وصولیے۔

کاشف اسرار احمد — جون 26، 2017 6:39 شام

کیا کہنے !
ظالم کی والدہ صاحبہ ساتھ ہی رہتیں ہیں ہر دم، ۔۔۔۔ ایسا مرا گمان ہے ! جو غلط بھی ہو سکتا ہے !
بہترین !
ماشا اللہ !

محمد وارث — جون 26، 2017 8:46 شام

ایک 45 سالہ بوڑھے کو، جو مسلسل عمر قید کی دوسری ٹرم بھی کاٹ رہا ہو اس کو ایک ایسی غزل میں ٹیگ کر دیا جس میں، آؤ گی، جاؤ گی، دکھاؤ گئی، سجاؤ گی، بناؤ گی، اٹھاؤ گی، بٹھاؤ گی، گھماؤ گی، پھراؤ گی کا اشتیاق بھرا بے رحمانہ استعمال بھی ہے اور ظالم کی سسکار بھری تکرار بھی، آپ نے اپنے قلم کی گوہر فشانی دکھا دی لیکن وہ گوہر کس کس کے زخموں پر نمک بن کر گرے اللہ ہی جانتا ہے۔ اب بوڑھوں کو رلاؤ گے کیا۔ ع۔ جا چھوڑ دیا حافظِ قرآن سمجھ کر

عاطف ملک — جون 27، 2017 4:09 صبح

عباد اللہ نے کہا:
اتنے سوالات کر کے رلاؤ گے کیا
تفنن برطرف بہت عمدہ

بہت شکریہ عباد بھائی!
حسنِ نظر ہے آپ کا

محمد عدنان اکبری نقیبی نے کہا:
یہ تو ظلم کی انتہا ہو گی۔
بہت عمدہ اور زبردست

بس کیا کہیے جی۔۔۔۔۔۔سہے جا رہے ہیں ظلم

پسندیدگی کا شکریہ

طاہر راجپوت ملتان نے کہا:
بہت ہی اعلی جی لاجوااب سخن اور کافیہ پیمائی کی
تمہارے لیےظالم؟ساری دنیا کو چھوڑا
مجھے یوں ہی تم چھوڑ جاؤ گی ظالم؟

بہت نوازش بھائی

لاریب مرزا نے کہا:
میڈیکل کے instruments کے علاوہ خالصتاً خواتین کے زیرِ استعمال instruments سے بھی خوب آگاہی ہے آپ کو۔
خوب شاعری ہے۔ بہت سی داد وصولیے۔

جب سر پہ آتی ہے تو instruments یاد کرنے پڑتے ہیں،ورنہ امتحان میں کامیابی نہیں ملتی

میڈیکل کے

کاشف اسرار احمد نے کہا:
کیا کہنے !
ظالم کی والدہ صاحبہ ساتھ ہی رہتیں ہیں ہر دم، ۔۔۔۔ ایسا مرا گمان ہے ! جو غلط بھی ہو سکتا ہے !
بہترین !
ماشا اللہ !

آپ کا گمان صحیح بھی تو ہو سکتا ہے

نوازش کاشف بھائی

محمد وارث نے کہا:
ایک 45 سالہ بوڑھے کو، جو مسلسل عمر قید کی دوسری ٹرم بھی کاٹ رہا ہو اس کو ایک ایسی غزل میں ٹیگ کر دیا جس میں، آؤ گی، جاؤ گی، دکھاؤ گئی، سجاؤ گی، بناؤ گی، اٹھاؤ گی، بٹھاؤ گی، گھماؤ گی، پھراؤ گی کا اشتیاق بھرا بے رحمانہ استعمال بھی ہے اور ظالم کی سسکار بھری تکرار بھی، آپ نے اپنے قلم کی گوہر فشانی دکھا دی لیکن وہ گوہر کس کس کے زخموں پر نمک بن کر گرے اللہ ہی جانتا ہے۔ اب بوڑھوں کو رلاؤ گے کیا۔ ع۔ جا چھوڑ دیا حافظِ قرآن سمجھ کر

اٹھاؤ گی، بٹھاؤ گی، کھلاؤ گی،گھماؤ پھراؤ گی سے تو ایک غزل اور ہو جائے گی

محترم آپ ہر مرتبہ متذبذب کر دیتے ہیں کہ "عمر قید" کا انتخاب کرنے میں عافیت ہے یا "پھانسی کے پھندے" پہ ہی لٹکتے رہیں

جس بوڑھے کو آپ نے یہ غزل پڑھائی،اس کی تکلیف کیلیے معذرت خواہ ہوں

محمد تابش صدیقی — جون 27، 2017 6:57 صبح

مجھے آپ سے ہمدردی ہے۔ اور اس وقت سے ہمدردی ہے کہ جب ظالم اپنے اصل معنوں میں استعمال ہو گا۔

عاطف ملک — جون 27، 2017 7:09 صبح

محمد تابش صدیقی نے کہا:
مجھے آپ سے ہمدردی ہے۔ اور اس وقت سے ہمدردی ہے کہ جب ظالم اپنے اصل معنوں میں استعمال ہو گا۔

محمد وارث صاحب۔۔۔۔۔اللہ نے آپ کی سن لی ہے

زبردست تابش بھائی :flower:

الف عین — جون 27، 2017 11:11 صبح

محمد خلیل الرحمٰن نے کہا:
استادِ محترم نے ہماری صلاح کو رد کردیا ہے چنانچہ صلاح واپس

میں نے رد کہاں کی؟ میں نے تو غزل کو اسی بدلی ہوئی شکل میں پایا ہے، اصل میں کیا تھا، اس کا علم نہیں۔

سید عاطف علی — جون 27، 2017 1:24 شام

محمد وارث نے کہا:
ایک 45 سالہ بوڑھے کو، جو مسلسل عمر قید کی دوسری ٹرم بھی کاٹ رہا ہو اس کو ایک ایسی غزل میں ٹیگ کر دیا جس میں، آؤ گی، جاؤ گی، دکھاؤ گئی، سجاؤ گی، بناؤ گی، اٹھاؤ گی، بٹھاؤ گی، گھماؤ گی، پھراؤ گی کا اشتیاق بھرا بے رحمانہ استعمال بھی ہے اور ظالم کی سسکار بھری تکرار بھی، آپ نے اپنے قلم کی گوہر فشانی دکھا دی لیکن وہ گوہر کس کس کے زخموں پر نمک بن کر گرے اللہ ہی جانتا ہے۔ اب بوڑھوں کو رلاؤ گے کیا۔ ع۔ جا چھوڑ دیا حافظِ قرآن سمجھ کر

سرخ سلام ایسی ترجمانی کو کہ جو چھاپ تلک سب چھین لے گئی کون جانے اس ایک مراسلے نے کیا ستم ڈھائے ہیں آہ ۔
ہے کوئی مردم گزیدہ ! گردن بریدہ !آہن چشیدہ ! جواس آہ کے کے پیچھے کی کہانی بلکہ درد کی داستانوں کے بل کھاتے پہلؤوں کا اندازہ کرے۔
کوئی مردم گزیدہ

فاخر رضا — مارچ 11، 2018 8:32 صبح

سید عاطف علی نے کہا:
سرخ سلام ایسی ترجمانی کو کہ جو چھاپ تلک سب چھین لے گئی کون جانے اس ایک مراسلے نے کیا ستم ڈھائے ہیں آہ ۔
ہے کوئی مردم گزیدہ ! گردن بریدہ !آہن چشیدہ ! جواس آہ کے کے پیچھے کی کہانی بلکہ درد کی داستانوں کے بل کھاتے پہلؤوں کا اندازہ کرے۔
کوئی مردم گزیدہ

یہ بار بار پڑھنے والی چیز ہے. واہ واہ

محمد وارث — مارچ 12، 2018 3:49 صبح

ڈاکٹر عاطف ملک صاحب بھی محفل سے کچھ رُوٹھے ہوئے لگتے ہیں، ان کو بھی واپسی کا راستہ دکھانا چاہیئے!