دل ہی دل میں کسے بلاتے ہو۔۔۔

سید اِجلاؔل حسین — فروری 4، 2013 11:16 شام

غزل

دل ہی دل میں کسے بلاتے ہو

کس قدر تنگ دلی دکھاتے ہو

ہم تو ہیں منتظر کہ کب،کس دن

ہم کو آواز تم لگاتے ہو

کیا محبت اِسی کو کہتے ہیں
کہ فراموش کرتے جاتے ہو
کر لیا وعدۂِ وصال تو پھر
خود ہی تم کیوں نہیں بلاتے ہو
یہ بھی کہتے ہو جان ہو میری
اور حقارت سے پیش آتے ہو
تم تو جزبوں کی بات رہنے دو
کیا مجھے عاشقی سکھاتے ہو
آؤ دل جیتنا سکھائیں تمہیں
کتنے سنگدل ہو دل دُکھاتے ہو!

آج اِجلؔال کیا ہوا تم کو

کس کو روداد یہ سناتے ہو

(سید اِجلؔال حسین -۴ فروری ، ۲۰۱۳؁ )

محمد خلیل الرحمٰن — فروری 5، 2013 3:57 صبح

سید اِجلاؔل حسین نے کہا:
تم تو جزبوں کی بات رہنے دو
کیا مجھے عاشقی سکھاتے ہو

آج اِجلؔال کیا ہوا تم کو
کس کو روداد یہ سناتے ہو

واہ واہ ۔ سید اجلال حسین بھائی داد قبول فرمائیے

سید زبیر — فروری 5، 2013 4:57 صبح

بہت خوبصورت کلام سید اِجلاؔل حسین !
کر لیا وعدۂِ وصال تو پھر
خود ہی تم کیوں نہیں بلاتے ہو
واہ ۔ ۔

سید اِجلاؔل حسین — فروری 5، 2013 9:08 صبح

محمد خلیل الرحمٰن نے کہا:
واہ واہ ۔ سید اجلال حسین بھائی داد قبول فرمائیے

سید زبیر نے کہا:
بہت خوبصورت کلام سید اِجلاؔل حسین !
کر لیا وعدۂِ وصال تو پھر
خود ہی تم کیوں نہیں بلاتے ہو
واہ ۔ ۔

آپ دونو حضرات کا غزل پسند فرمانے، اور داد دینے پر تہ دل سے ممنون ہوں! سلامت رہیئے۔

الف عین — فروری 5، 2013 9:45 صبح

بہت خوب اجلال، بس دو اشعار میں تصحیح کی ضرورت ہے۔

دل ہی دل میں کسے بلاتے ہو

کس قدر تنگ دلی دکھاتے ہو

آؤ دل جیتنا سکھائیں تمہیں
کتنے سنگدل ہو دل دُکھاتے ہو!

ان دونوں میں سنگ دل اور تنگ دل میں گاف تقطیع میں نہیں آ رہا ہے۔ اگر پہلے مصرع میں ’بے رخی‘ کر دیا جائے اور دوسرے شعر میں سنگدل کو ’ظالم‘ سے بدل دیا جائے تو اصلاح یہیں ختم ہو جاتی ہے!!!

سید اِجلاؔل حسین — فروری 5، 2013 10:37 صبح

الف عین نے کہا:
بہت خوب اجلال، بس دو اشعار میں تصحیح کی ضرورت ہے۔

دل ہی دل میں کسے بلاتے ہو
کس قدر تنگ دلی دکھاتے ہو
آؤ دل جیتنا سکھائیں تمہیں
کتنے سنگدل ہو دل دُکھاتے ہو!
ان دونوں میں سنگ دل اور تنگ دل میں گاف تقطیع میں نہیں آ رہا ہے۔ اگر پہلے مصرع میں ’بے رخی‘ کر دیا جائے اور دوسرے شعر میں سنگدل کو ’ظالم‘ سے بدل دیا جائے تو اصلاح یہیں ختم ہو جاتی ہے!!!

محترم الف عین بھائی،
آداب عرض ہے۔ داد کے لئے آپکا تہ دل سے ممنون ہوں! دراصل تنگ اور سنگ کی تقطیع پر ہی شبہ تھا، اسی لیئے غزل کو اصلاح کے لیئے ڈالا تھا۔ قیاص تھا کہ دونوں الفاظ کی تقطیع واحد ہجائے بلند ہو گی (یعنی 2) اور ایسا سوچنے کی وجہ یہ تھی کہ دونو میں 'ن' بطور غنہ بولا جاتا ہے۔ اصلاح کرنے کا بیحد شکریہ!
سلامت رہیئے!

محمد خلیل الرحمٰن — فروری 7، 2013 2:30 صبح

کیا محبت اِسی کو کہتے ہیں
کہ فراموش کرتے جاتے ہو

یوں کردیا جائے اگر؟

کیا محبت اسی کو کہتے ہیں

یوں فراموش کرتے جاتے ہو