Dr Ajab — فروری 8، 2019 12:17 شام
چند اشعار حاضر ہیں ۔رہنمائ کا طالب ہوں۔
ہائے وہ لوگ کتنے اچھے ہیں
جو عداوت میں یار سچے ہیں
پھینک لیں آؤ ہم بھی کچھ پتھر
پھل شجر پر غضب کے پکے ہیں
ڈو بنا ہی ہے عشق دریا میں
جب گھڑے سب عمل کے کچے ہیں
دل سے بےشک یہ پوچھ لو دلبر
اس مسافت میں ہم کہاں تھکے ہیں
کیا ملا عشق سے عجب تمہیں
تو نے تو اس کے ذائقے چھکے ہیں
سفیر آفریدی — فروری 8، 2019 2:38 شام
جب گهڑے سب عمل کے کچے ہیں
فلسفی — فروری 8، 2019 3:42 شام
مطلع کی وجہ سے شاید پکے اور تھکے درست قافیہ نہیں۔
مطلع میں عداوت میں سچے لوگ، اچھے کیسے ہو سکتے ہیں؟
الف عین
سید عاطف علی
محمد خلیل الرحمٰن
الف عین — فروری 9، 2019 3:57 صبح
آخری دو اشعار تو وزن میں ہی نہیں، یا یوں کہوں کہ وزن میں ہیں لیکن چنیدہ زمین میں نہیں. چک ہے اور تک ہے تقطیع ہو رہے ہیں چکھے ہیں اور تھکے ہیں، ے کے اسقاط کے ساتھ جو مستحسن نہیں
پہلے تینوں اشعار میں قوافی تشدید کے ساتھ تقطیع ہوتے ہیں۔ اچھے، کچے تو درست ہیں لیکن پکے میں کاف پر شد غلط ہے ۔
عشق دریا؟ مراد عشق کا دریا؟ کچے گھڑے سے شاید کچھ پنجابی کی تلمیح سنی ہے اس وقت یاد نہیں آ رہی، اردو غزل میں تو بہر حال میں نے دیکھی نہیں، ماہیوں میں کہیں دیکھی تھی
Dr Ajab — فروری 9، 2019 5:59 صبح
استاد محترم الف عین صاحب
کیا فا علاتن مفاعلن فعلن کے ساتھ
فاعلا تن مفاعلن فَعِلن نہیں لایا جا سکتا ہے
دل سے بےشک پو چھ لو دلبر
( فاعلا تن مفاعلن فعلن)
اس مسافت میں ہم کہاں تھکے ہیں
فاعلاتن مفاعلن فَعِلن
ضرور رہنمائ کریں۔ میں طفلِ مکتب ِ شاعری ہوں
انیس جان — فروری 9، 2019 9:34 صبح
فعِلن آسکتا ہے لیکن فعولن نہیں
تھکے ہیں۔۔کا وزن فعولن یے
الف عین — فروری 10، 2019 3:02 شام
'تکِ ہے' ضرور آ سکتا ہے لیکن یہ زمین نہیں۔ زمین میں چھے ہیں، چے ہیں، ے مکمل تقطیع کے ساتھ، تھکے ہیں میں ے گر جاتی ہے
Dr Ajab — فروری 11، 2019 7:37 صبح
استاد محترم الف عین صاحب رہنمائ کےلیے شکریہ۔ذرا اس کے بارے بھی رہنمائ کریں۔ مجھے کتاب سے تصویر بنا کر آپ کو بھیجنے کا یہاں طریقہ نہیں آ رہا پھر بھی آپ کو فرہنگ تلفظ سے ہو بہو نقل بھیج رہا ہوں ۔رہنمائ کریں۔
پَکّا فت پ ، شد ک۔صف۔پکایا ہوا ، پختہ ، رسیدہ (پھل) تیار( فصل) ،تپایا ہوا (برتن، اینٹ وغیرہ ) ، قابل اعتبار ، باوثوق ( قول، عہد و غیرہ ) مستحکم مضبو ط ( عمارت وغیرہ)
آپنے فرمایا لفظ پکے میں ک پر شد غلط ہے۔
رہنمائ کریں
فلسفی — فروری 11، 2019 7:42 صبح
استاد محترم الف عین صاحب رہنمائ کےلیے شکریہ۔ذرا اس کے بارے بھی رہنمائ کریں۔ مجھے کتاب سے تصویر بنا کر آپ کو بھیجنے کا یہاں طریقہ نہیں آ رہا پھر بھی آپ کو فرہنگ تلفظ سے ہو بہو نقل بھیج رہا ہوں ۔رہنمائ کریں۔
پَکّا فت پ ، شد ک۔صف۔پکایا ہوا ، پختہ ، رسیدہ (پھل) تیار( فصل) ،تپایا ہوا (برتن، اینٹ وغیرہ ) ، قابل اعتبار ، باوثوق ( قول، عہد و غیرہ ) مستحکم مضبو ط ( عمارت وغیرہ)
آپنے فرمایا لفظ پکے میں ک پر شد غلط ہے۔
رہنمائ کریں
میری ناقص فہم کے مطابق، آپ اسم "پکَے" (فعلن)، کی بات کر رہے ہیں۔ جبکہ مصرعے میں محل فعل "پَکے" (فعو) کا ہے۔