سر پر ہے یادِ یار کی چادر تنی ہوئی ۔ برائے اصلاح

محمد عبدالرؤوف — مئی 27، 2024 3:39 شام

سر پر ہے یادِ یار کی چادر تنی ہوئی
دھوپ اب تفکرات کی آئے چھنی ہوئی
کیوں میرِ شہر سے ہے مرا مختلف مزاج
میری خطا یہ قابلِ گردن زنی ہوئی
زنجیر کیا ہلائیں گے زنجیر بند لوگ
جب منصفی کی بات ہی ناگفتنی ہوئی
یوں چھا گیا ہے دہر پہ دورِ برہنگی
ہر سمت ایک کھیل سی عریاں تنی ہوئی
ہیں بزمِ دوستاں کے وہ احوال ان دنوں
ہر ایک لفظ تیر کی جیسے انی ہوئی
زاہد وہ دوڑ دھوپ سے جائے گی اب فقط
خلوت نشینیوں سے جو تر دامنی ہوئی
یہ دورِ اضطراب ہے تب تک بنا ہوا
جب تک ہے زندگی کی اجل سے ٹھنی ہوئی
ان کا ہے کھیل ہوش اڑایں دکھا کے خواب
دیوانوں کی ہے جان پہ لیکن بنی ہوئی

ارشد چوہدری — مئی 27، 2024 4:20 شام

بہت خوب ،بہت اچھے خیالات ،باریکیاں تو اساتذہ دیکھیں گے

الف عین — مئی 27، 2024 11:16 شام

محمد عبدالرؤوف نے کہا:
محترم الف عین ، ظہیراحمدظہیر
سر پر ہے یادِ یار کی چادر تنی ہوئی
دھوپ اب تفکرات کی آئے چھنی ہوئی

دوسرے مصرعے کا بیانیہ کچھ بوجھل ہو گیا ہے، "پب" کی وجہ سے، کچھ تبدیلی کرو

محمد عبدالرؤوف نے کہا:
کیوں میرِ شہر سے ہے مرا مختلف مزاج
میری خطا یہ قابلِ گردن زنی ہوئی

قابل اضافی ہے، گردن زدنی کا مطلب ہی یہ ہے کہ گردن مار دیے جانے کے قابل! صرف گرد ن زدنی کافی ہے

محمد عبدالرؤوف نے کہا:
زنجیر کیا ہلائیں گے زنجیر بند لوگ
جب منصفی کی بات ہی ناگفتنی ہوئی

درست

محمد عبدالرؤوف نے کہا:
یوں چھا گیا ہے دہر پہ دورِ برہنگی
ہر سمت ایک کھیل سی عریاں تنی ہوئی

مصرع ثانی سمجھ نہیں سکا

محمد عبدالرؤوف نے کہا:
ہیں بزمِ دوستاں کے وہ احوال ان دنوں
ہر ایک لفظ تیر کی جیسے انی ہوئی

اس میں بھی ثانی کا بیانیہ رواں نہیں ۔" جیسے" پہلے لانے کی ضرورت ہے شاید

محمد عبدالرؤوف نے کہا:
زاہد وہ دوڑ دھوپ سے جائے گی اب فقط
خلوت نشینیوں سے جو تر دامنی ہوئی

اس میں بھی وضاحت کی کچھ کمی ہے

محمد عبدالرؤوف نے کہا:
یہ دورِ اضطراب ہے تب تک بنا ہوا
جب تک ہے زندگی کی اجل سے ٹھنی ہوئی

دور کا بننا عجیب فعل لگتا ہے

محمد عبدالرؤوف نے کہا:
ان کا ہے کھیل ہوش اڑایں دکھا کے خواب
دیوانوں کی ہے جان پہ لیکن بنی ہوئی

یہاں مصرع اول کا بیانیہ مجہول ہو گیا ہے

الف عین — مئی 27، 2024 11:18 شام

الف عین نے کہا:
قابل اضافی ہے، گردن زدنی کا مطلب ہی یہ ہے کہ گردن مار دیے جانے کے قابل! صرف گرد ن زدنی کافی ہے

معذرت، تم نے گردن زنی لفظ استعمال کیا ہے نہ جانے میں گردن زدنی کس طرح پڑھ گیا جب کہ وہ بحر میں ہی نہیں آتا۔ ترکیب تو درست ہے، اگرچہ ریختہ کی ڈکشنری میں گردن زنی کی مثالیں نہیں مل سکیں، صرف گردن زدنی ہی عام استعمال ہے۔

محمد عبدالرؤوف — مئی 31، 2024 8:18 صبح

محمد عبدالرؤوف نے کہا:
سر پر ہے یادِ یار کی چادر تنی ہوئی
دھوپ اب تفکرات کی آئے چھنی ہوئی

الف عین نے کہا:
دوسرے مصرعے کا بیانیہ کچھ بوجھل ہو گیا ہے، "پب" کی وجہ سے، کچھ تبدیلی کرو

سر پر ہے یادِ یار کی چادر تنی ہوئی
غم کی کڑکتی دھوپ اب/بھی آئے چھنی ہوئی

محمد عبدالرؤوف نے کہا:
یوں چھا گیا ہے دہر پہ دورِ برہنگی
ہر سمت ایک کھیل سی عریاں تنی ہوئی

الف عین نے کہا:
مصرع ثانی سمجھ نہیں سکا

یعنی کہ عریاں تنی اب دنیا میں محض ایک کھیل بن کر رہ گیا ہے، کوئی بڑی بات نہیں رہی۔

محمد عبدالرؤوف نے کہا:
ہیں بزمِ دوستاں کے وہ احوال ان دنوں
ہر ایک لفظ تیر کی جیسے انی ہوئی

الف عین نے کہا:
اس میں بھی ثانی کا بیانیہ رواں نہیں ۔" جیسے" پہلے لانے کی ضرورت ہے شاید

ہیں بزمِ دوستاں کے وہ احوال ان دنوں
ہر لفظ جیسے تیر کی ہے اک انی ہوئی

محمد عبدالرؤوف نے کہا:
زاہد وہ دوڑ دھوپ سے جائے گی اب فقط
خلوت نشینیوں سے جو تر دامنی ہوئی

الف عین نے کہا:
اس میں بھی وضاحت کی کچھ کمی ہے

یعنی کہ زاہد نے جو میدان عمل کو چھوڑ کر گناہ کیا ہے اب اُس کا ازالہ سخت محنت سے ہی ممکن ہے۔

محمد عبدالرؤوف نے کہا:
یہ دورِ اضطراب ہے تب تک بنا ہوا
جب تک ہے زندگی کی اجل سے ٹھنی ہوئی

لغت میں "بنا ہوا" کے معنی کسی چیز قائم ہونے/رہنے کے بھی آ رہے ہیں۔
"یہ دورِ اضطراب ہے تب تک حیات میں"

محمد عبدالرؤوف نے کہا:
ان کا ہے کھیل ہوش اڑایں دکھا کے خواب
دیوانوں کی ہے جان پہ لیکن بنی ہوئی

یعنی کہ خواب دکھانے والے/لیڈران/ پیشواؤں کا تو محض کھیل ہوتا ہے وہ خواب دکھاتے ہیں اور ان کے ماننے والے سر دھڑ کی بازیاں لگا دیتے ہیں۔

الف عین — جون 1، 2024 10:42 شام

تمہاری وضاحت ہی اس بات کا ثبوت ہے کہ یہ اشعار عجز بیان کے شکار ہیں۔
مطلع کا دوسرا مصرع روان نہیں
شاید غموں کی دھوپ اب آئے.... بہتر ہو گا۔
"تنی ہوئی" سے مراد وہی "چادر تنی ہوئی" کے معنوں میں سمجھا تھا۔ بدنی کے معنی تک نہیں۔ عریاں بدنی، گل بدنی وغیرہ استعمال کیے جاتے ہیں۔ "تنی" کے ساتھ نہ جانے کیوں مستعمل نہیں۔ویسے شاید تلاش سے اسناد بھی مل جائیں ۔ میں عموماً تلاش نہیں کرتا، اپنے ناقص علم پر ہی بھروسہ کر لیا کرتا ہوں۔
" انی ہوئی"! اگر اسے درست مانا جائے تب بھی مثال کے ساتھ ہوا/ہوئی استعمال نہیں ہوتے، سیدھا سادہ ہے/ہیں کہے جاتے ہیں۔ اس لئے بھی"انی ہوئی" اچھا نہیں لگتا ۔

محمد عبدالرؤوف نے کہا:
دورِ اضطراب ہے تب تک حیات میں

پچھلا مصرع ہی اس سے رواں تر ہے۔

محمد عبدالرؤوف — جون 2، 2024 1:40 صبح

الف عین نے کہا:
تمہاری وضاحت ہی اس بات کا ثبوت ہے کہ یہ اشعار عجز بیان کے شکار ہیں۔

بہت بہتر، اب اس غزل پر مزید کام کرنا درست نہیں۔