غزل برائے اصلاح

وجاہت حسین الحنفی حافظ — اگست 21، 2017 10:25 شام

السلام علیکم۔ امید ہے کہ آپ سب دوست خیریت سے ہونگے۔

یہ ووسری غزل ہے۔ تمام اساتذہ کرام اور احباب سے گزارش ہے کہ جس طرح پہلے غزل پر تنقید و تبصرے سے رہنمائی کی اسی طرح اس پر بھی اپنی آراء سے نوازیں۔ جزاکم اللہ خیر۔

چراغِ آسماں میں جو برابر آگ جلتی ہے
کسی مہتاب خاتونِ فلک کی چال لگتی ہے
جو پی کر جام عرفاں کے بہک جائے پھسل جائے
اسے لعنت شرابوں کی ہزاروں بارلگتی ہے
جہنم میں پڑا ہے تو یہ واعظ سوچتا ہو گا
کسی بائیں فرشتے کی یہ مجھ کو چال لگتی ہے
بڑے خوش تھے، ملے تھے تم جو آغازِ محبت میں
یہ کیا بیتی؟ کہ اب صورت بڑی ویران لگتی ہے
اسے معلوم ہے انجام الفت کا مگر پھر بھی
وہ میرے ساتھ جلتی ہے، وہ میرے ساتھ لگتی ہے
نگاہوں میں جو بادہ ہے کبھی خیرات ہی کر دو
نظر کے مستحق ہیں ہم ہمیں خیرات لگتی ہے
وہ ناداں باعثِ ذلت ہیں اے حافظ کہ جن کو یہ
زوالِ آدمِ خاکی ذرا سی بات لگتی ہے

وجاہت حسین الحنفی حافظ — اگست 21، 2017 10:31 شام

سر الف عین

سر محمد وارث

سر محمد ریحان قریشی

سر راحیل فاروق

سر فرحان محمد خان

فرحان محمد خان — اگست 21، 2017 10:52 شام

وجاہت حسین الحنفی حافظ نے کہا:
سر الف عین

سر محمد وارث
سر محمد ریحان قریشی
سر راحیل فاروق
سر فرحان محمد خان

بھائی مجھے کہاں آپ نے سر لکھ دیا میں ابھی خود طالبِ علم ہوں

وجاہت حسین الحنفی حافظ — اگست 21، 2017 10:55 شام

طالب علم تو ہم سب ہیں۔ آپ کا تجربہ بہرحال شاعری میں مجھ سے زیادہ ہی ہے۔ اس لیے سر لکھ دیا۔

فرحان محمد خان — اگست 21، 2017 11:00 شام

کیا آپ نے اس کا قافیہ جلتی اور لگتی لیا ہے ؟

وجاہت حسین الحنفی حافظ — اگست 21، 2017 11:06 شام

جی فرحان بھائی۔ قافیہ جلتی اور لگتی لیا ہے۔

محمد ریحان قریشی — اگست 22، 2017 6:47 صبح

جلتی اور لگتی درست قوافی نہیں ان میں ایطائے جلی ہے۔ مطلع کے سوا باقی تمام غزل میں ایک ہی قافیے کا استعمال بھی اچھا نہیں۔

وجاہت حسین الحنفی حافظ نے کہا:
چراغِ آسماں میں جو برابر آگ جلتی ہے
کسی مہتاب خاتونِ فلک کی چال لگتی ہے

اچھا ہے۔

وجاہت حسین الحنفی حافظ نے کہا:
وہ ناداں باعثِ ذلت ہیں اے حافظ کہ جن کو یہ

باعثِ ذلت کس کے لیے؟

وجاہت حسین الحنفی حافظ — اگست 22، 2017 9:43 صبح

محمد ریحان قریشی نے کہا:
جلتی اور لگتی درست قوافی نہیں ان میں ایطائے جلی ہے۔

تبصرے کا شکریہ۔ سر قوافی میں اس قسم کی مسائل سے متعلق کوئی کتاب یا مضمون مل سکتا ہے؟ تاکہ میں اس کا مطالعہ کر کے ان غلطیوں سے حتی الامکان بچنے کی کوشش کروں۔
مزید یہ کہ اگر میں مطلع کو یوں کر دوں کہ
’’چراغِ آسماں میں جو برابر آگ لگتی ہے
کسی مہتاب خاتونِ فلک کی چال لگتی ہے‘‘
تو اس سے فنی اعتبار سے غزل میں کیا نقص پیدا ہوگا؟

محمد ریحان قریشی نے کہا:
باعثِ ذلت کس کے لیے؟

یعنی جو آدمی پر اس دور میں مجموعی طور پر ایک زوال آیا ہوا ہے۔ جو لوگ اسے ہلکا سمجھتے ہیں اور اس کے لیے کچھ کرتے نہیں وہ لوگ اس زوال میں کسی نہ کسی طرح حصہ دار ہیں۔
آپ احباب کی بدولت بہت سیکھنے کو مل رہا ہے۔ اللہ پاک آپ کو اس کا اعلیٰ اجر عطاء فرمائے۔ آمین۔

محمد ریحان قریشی — اگست 22، 2017 9:48 صبح

وجاہت حسین الحنفی حافظ نے کہا:
سر قوافی میں اس قسم کی مسائل سے متعلق کوئی کتاب یا مضمون مل سکتا ہے؟ تاکہ میں اس کا مطالعہ کر کے ان غلطیوں سے حتی الامکان بچنے کی کوشش کروں۔

علمِ قافیہ

وجاہت حسین الحنفی حافظ نے کہا:
تو اس سے فنی اعتبار سے غزل میں کیا نقص پیدا ہوگا؟

قافیہ غزل کا اہم جزو ہے جس کے بغیر غزل کہی نہیں جا سکتی۔

وجاہت حسین الحنفی حافظ نے کہا:
یعنی جو آدمی پر اس دور میں مجموعی طور پر ایک زوال آیا ہوا ہے۔ جو لوگ اسے ہلکا سمجھتے ہیں اور اس کے لیے کچھ کرتے نہیں وہ لوگ اس زوال میں کسی نہ کسی طرح حصہ دار ہیں۔

کم از کم میں تو یہ معنی اس شعر سے اخذ نہیں کر پاؤں گا۔

الف عین — اگست 22، 2017 7:06 شام

احباب کی آراء کے مطابق غزل میں ترمیم کریں تو اصلاح آگے بڑھے۔