غزل ۔ اساتذہ کی رائے درکار ہے

جناب محترم الف عین صاحب اور دیگر اساتذہ اکرام، آپ سے اصلاح کی گذارش ہے۔
فاعلن فاعلن فاعلن فاعلن
تیرے غم کی جو مجھ کو سزا ہو گئی
گویا یوں عشق کی ابتدا ہو گئی
جب سے آئے ہو تم دشتِ دل میں مرے
صورت زندگی خوشنما ہو گئی
مجھ کو محبوب تھی میری سنجیدگی
اک ملاقات میں جو فنا ہوگئی
لفظ ملتے نہیں حالتِ زار کو
آہ نکلی جو دل سے دعا ہو گئی
میں نے سوچی تھی جو بے حیائی تھی وہ
بات تم نے کہی تو ادا ہو گئی
شورِ طوفاں کا دل میں بھی تھمنے لگا
بادِ صر صر بھی دیکھو صبا ہو گئی
شوقِ دیدار نے مجھ کو بے خود کیا
یہ نظر عشق میں بے حیا ہو گئی

کچھ شعروں نے تو ایسا لطف دیا ہے کہ واللہ بیان میں نہیں آتا۔ آپ ہی کا حصہ ہے جو یہ کمال کر دکھایا۔

محمد عظیم الدین نے کہا:

میں نے سوچی تھی جو بے حیائی تھی وہ
بات تم نے کہی تو ادا ہو گئی

مزید نمائش کے لیے کلک کریں۔۔۔

گو مصرعِ اولیٰ کی بنت میں ایک قسم کی بدویت ہے مگر اس احساس کی داد کوئی سمجھ لے تو آپ کا ماتھا چوم کر دے۔

محمد عظیم الدین نے کہا:

لفظ ملتے نہیں حالتِ زار کو
آہ نکلی جو دل سے دعا ہو گئی

مزید نمائش کے لیے کلک کریں۔۔۔

کیا داد دیں اس کی۔ کتنے سچے آدمی ہیں آپ!

محمد عظیم الدین نے کہا:

شوقِ دیدار نے مجھ کو بے خود کیا
یہ نظر عشق میں بے حیا ہو گئی

مزید نمائش کے لیے کلک کریں۔۔۔

بھائی، دل بےایمان ہو گیا ہے اس شعر پہ۔ ایسے شعروں پہ شاعر حسد کرتے ہیں کہ یہ ہم نے کیوں نہ کہا۔
ایک دو جگہوں پر مجھے کچھ کمی محسوس ہوتی ہے مگر واللہ اپنا آپ اس لائق نہیں معلوم ہو رہا کہ آپ کو کچھ سکھاؤں پڑھاؤں۔ میری شدید خواہش ہے کہ آپ کسی طور اپنا یہ طرزِ احساس اور طرزِ بیان مناسب اصلاح کے بعد بھی قائم رکھ پائیں کہ اصلاح کرنے والے اکثر شاعر کے اصلی جوہر کا گلا گھونٹ کر رکھ دیتے ہیں۔ اگر اللہ نے اردو کا نصیب اچھا رکھا ہے تو آپ اپنی اور ہماری سوچ سے آگے کا سفر کریں گے، ان شاء اللہ۔ ہم تو دعا ہی کر سکتے ہیں کہ خدا اب اردو شاعری کے مرے ہوئے بدن میں آپ کے وسیلے سے نئی روح پھونک ہی دے۔

جناب محترم راحیل فاروق صاحب بہت مہربانی آپ کی۔ تبصرے ، داد اور حوصلہ افزائی کے لیے بہت بہت شکریہ۔ آپ نے تو شرمندہ ہی کردیا اتنا کچھ اس نالائق کے بارے میں لکھ کر۔
آپ کا جواب رات دیر سے دیکھا تھا، کچھ نیند کا غلبہ تھا اور کچھ اگلے دن کی ترتیب کی فکراس لیے فوری جواب نہیں لکھ پایا۔ لیکن یقین کریں آپ کے الفاظ ساری رات گدگداتے رہے۔ طرز احساس کے بارے میں جو بات آپ نے فرمائی اس حوالے سے اتنا ضرور کہوں گا کہ چند باتیں عروض کے بارے میں جاننے سے پہلے خیال اور الفاظ ایک مستی اور لہر کے ساتھ وارد ہوتے تھے اور ایک ہی لمحے میں کئی کئی اشعار ہو جاتے تھے (اگرچہ موزوں نہیں ہوتے تھے)، لیکن اب یہ حال ہے کے الفاظ تو ملتے ہی نہیں اور خیال بھی شاید روٹھ گیا ہے۔ جیسا محمد ریحان قریشی صاحب نے جناب محمد یعقوب آسی صاحب کا ایک شعر ایک لڑی میں لکھا تھا، خود کو بالکل اس کا مصداق پاتا ہوں۔
یوں خیالوں کی تصویر قرطاس پر کیسے بن پائے گی
لفظ کھو جائیں گے فن کی باریکیاں ڈھونڈتے ڈھونڈتے
آپ کی دعاؤں اور نیک تمناؤں کے لیے تہہ دل سے مشکور ہوں۔ آپ کا حسن ظن ہے اور ذرہ نوازی ہے ورنہ میرے حساب سے میں فن سے بالکل ناواقف ہوں اور یقینا اس فورم کے اساتذہ کا سب سے نالائق شاگرد بھی۔ بس آپ حضرات راہنمائی فرماتے رہیں مجھ ناچیز کے لیے یہ بہت بڑی نعمت ہے۔ اللہ تعالی آپ سب حضرات کو جزائے خیر عطا فرمائے۔

گویا یوں عشق کی ابتدا ہو گئی
عیب تنافر آ گیا ہے۔ یا، یوں میں۔ ’اس طرح‘ ’ایسے بس‘ یا کچھ متبادل کا سوچو۔
جب سے آئے ہو تم دشتِ دل میں مرے
صورت زندگی خوشنما ہو گئی
÷÷جانے کیوں مجھے صیغہ غائب میں اچھا لگ رہا ہے
دشت دل میں جو اس نے قدم رکھ دیا
کیسا رہے گا؟
لفظ ملتے نہیں حالتِ زار کو
۔۔حالت زار کے بیان کرنے کو یا محض حالت زار کو؟

بہت مہربانی جناب محترم الف عین صاحب۔

الف عین نے کہا:

گویا یوں عشق کی ابتدا ہو گئی
عیب تنافر آ گیا ہے۔ یا، یوں میں۔ ’اس طرح‘ ’ایسے بس‘ یا کچھ متبادل کا سوچو۔

مزید نمائش کے لیے کلک کریں۔۔۔

'یوں' کے بجائے 'اب' مناسب ہے؟
گویا اب عشق کی ابتدا ہو گئی

الف عین نے کہا:

جب سے آئے ہو تم دشتِ دل میں مرے
صورت زندگی خوشنما ہو گئی
÷÷جانے کیوں مجھے صیغہ غائب میں اچھا لگ رہا ہے
دشت دل میں جو اس نے قدم رکھ دیا
کیسا رہے گا؟

مزید نمائش کے لیے کلک کریں۔۔۔

بہت بہتر
دشتِ دل میں جو تم نے قدم رکھ دیا

الف عین نے کہا:

لفظ ملتے نہیں حالتِ زار کو
۔۔حالت زار کے بیان کرنے کو یا محض حالت زار کو؟

مزید نمائش کے لیے کلک کریں۔۔۔

جناب اگر 'کو' کے بجائے 'پر' لگا دیا جائے تو یہ مصرع قابل پرواز ہو جائے گا؟ یعنی
لفظ ملتے نہیں حالتِ زارپر

یقینا خیالات اعلی اور قابل داد ہیں.

امان اللہ زرگر نے کہا:

یقینا خیالات اعلی اور قابل داد ہیں.

مزید نمائش کے لیے کلک کریں۔۔۔

بہت شکریہ جناب امان اللہ زرگر صاحب

محمد عظیم الدین نے کہا:

لفظ ملتے نہیں حالتِ زار کو
آہ نکلی جو دل سے دعا ہو گئی

مزید نمائش کے لیے کلک کریں۔۔۔

بہت خوب ہے!
خیالات نئے اور منفرد ہیں.
اور راحیل فاروق بھائی نے تعریف کی ہے تو اس کا مطلب ہے بہت ہی عمدہ غزل ہے۔
داد قبول کیجیے!

عاطف ملک نے کہا:

بہت خوب ہے!
خیالات نئے اور منفرد ہیں.
اور راحیل فاروق بھائی نے تعریف کی ہے تو اس کا مطلب ہے بہت ہی عمدہ غزل ہے۔
داد قبول کیجیے!

مزید نمائش کے لیے کلک کریں۔۔۔

بڑی شفقت فرمائی ہے جناب راحیل فاروق صاحب نے
آپ کی داد کا شکریہ

کیا کہنے - بہت خوب۔ داد قبول کیجئے -

منصور محبوب چوہدری نے کہا:

کیا کہنے - بہت خوب۔ داد قبول کیجئے -

مزید نمائش کے لیے کلک کریں۔۔۔

بہت شکریہ جناب منصور محبوب چوہدری صاحب

محمد عظیم الدین نے کہا:

جناب اگر 'کو' کے بجائے 'پر' لگا دیا جائے تو یہ مصرع قابل پرواز ہو جائے گا؟ یعنی
لفظ ملتے نہیں حالتِ زارپر

مزید نمائش کے لیے کلک کریں۔۔۔

نہیں بھئی، مزا نہیں آیا

الف عین نے کہا:

نہیں بھئی، مزا نہیں آیا

مزید نمائش کے لیے کلک کریں۔۔۔

محترم جناب الف عین صاحب آپ نے مشکل میں ڈال دیا ۔ میں تو مصرع تبدیل نہیں کرنا چاہ رہا تھا ۔ خیر کچھ اور سوچتا ہوں ۔

دعا والا شعر درست ہے۔ لیکن ادا والا تو پچھلا بھی خوب تھا۔ راحیل نے اعتراض تو نہیں کیا تھا!!
اگر بدلنا ہی ہے تو یوں زیادہ چست ہو گا۔
میری یہ سادگی تم کو شوخی لگی ۔
اور تم نے کہی تو ادا ہو گئی

الف عین نے کہا:

دعا والا شعر درست ہے۔ لیکن ادا والا تو پچھلا بھی خوب تھا۔ راحیل نے اعتراض تو نہیں کیا تھا!!
اگر بدلنا ہی ہے تو یوں زیادہ چست ہو گا۔
میری یہ سادگی تم کو شوخی لگی ۔
اور تم نے کہی تو ادا ہو گئی

مزید نمائش کے لیے کلک کریں۔۔۔

بہت شکریہ جناب محترم الف عین صاحب ، ادا والا مصرع تو مجھے بھی پہلے والا ہی اچھا لگا تھا۔ لیکن میں سمجھا شاید راحیل فاروق صاحب نے جو بدویت کی نشاندہی کی ہے وہ شاید عیب تصور ہوتا ہے۔ اس لیے کچھ بدلنے کا سوچا تھا۔