میں احباب کے سامنے چند اشعار رکھتا ہوں، بتلائیے کہ اسلام میں ان اشعار کی کیا اہمیت و حیثیت ہے۔
یگانہ
بندگی کا ثبوت دوں کیونکر
اس سے بہتر ہے کیجیے انکار
یگانہ کا ہی شعر ہے،
بجز ارادہ پرستی خدا کو کیا جانے
وہ بد نصیب جسے بخت نا رسا نہ ملا
///
جوش ملیح آبادی،
جس وقت جھلکتی ہے مناظر کی جبیں
راسخ ہو جاتا ہے ذات باری کا یقین
کرتا ہوں جب انساں کی تباہی پہ نظر
دِل پوچھنے لگتا ہے خدا ہے کہ نہیں
چند مزید اشعار
علت کا نہ معلول و قضا کا منکر
حاشا نہ خبر، نہ مبتدا کا منکر
یاروں نے تشخص کا تراشا ہے جو بُت
الحاد ہے صرف ایسے خدا کا مُنکر
///
احمد ندیم قاسمی
اے خدا اب ترے فردوس پہ میرا حق ہے
تُو نے اس دور کے دوزخ میں جلایا ہے مُجھے
قاسمی کے دو مزید اشعار،
مرا کوئی بھی نہیں کائنات بھر میں ندیم
اگر خدا بھی نہ ہوتا تو میں کدھر جاتا
یزداں پہ جھپٹ پڑے گا انساں
انسان ہٹا جو درمیان سے
///
احباب اپنی رائے دے لیں تو میں بھی کچھ عرض کرنے کی جسارت کروں گا۔
لاجواب ۔۔۔ عمدہ اپنی نوعیت کے اعلی ترین اشعار کا انتخاب کیا ہے آپ نے بالخصوص عصر حاضر میں ان اشعار کی اشد ضرورت ہے۔
میں سمجتھا ہوں کہ شرعی اعتبار سے کوئی بھی کفریہ و شرکیہ یا پھر نازیبا بات نہیں کی گئی البتہ مفاہیم و مطالب کو سمجھنے کی ضرورت ہے۔ اشعار میں صرف ظاہری الفاظ پر گفتگو نہیں کی جاسکتی بلکہ اس میں موجود استعارات و تشبیہات اور مقصد کو سمجھنا بھی ضروری ہے۔ جیسے جوش ہی کا ایک شعر ہے کہ
ملا جو موقع تو روک دوں گا جلال روز حساب تیرا
پڑھوں گا رحمت کا وہ قصیدہ کہ ہنس پڑے گا عتاب تیرا
اور یہ رباعی دیکھیے
اس وقت سبک بات نہیں ہو سکتی
توہین خرابات نہیں ہو سکتی
جبریل امیں آئے ہیں مجرے کے لیے
کہہ دو کہ ملاقات نہیں ہو سکتی
اقبال کا یہ شعر
سمندر سے ملے پیاسے کو شبنم
بخیلی ہے یہ رزاقی نہیں ہے
اور
احمد ندیم قاسمی صاحب کا
اک مددت گناہ ملی وہ بھی چار دن
دیکھے ہیں ہم نے حوصلے پروردگار کے
مجروح سلطان پوری صاحب کے یہ اشعار
مجھ سے کہا جبریل جنوں نے یہ بھی وحی الہی ہے
مذہب تو مذہب دل ہے باقی سب گمراہی ہے
ہم جو ہوئے فردوس بدر تقصیر تھی آدم کی مگر
میری یہ دربدری میری ناکردہ گناہی ہے
