اجے قیامت نئیں آئی
وال ودھا لئے رانجھے نیں تے ٹِنڈ کرا لئی ہِیراں نیں
مِرزے خاں نال دھوکہ کیتا اوہدے اپنیاں تِیراں نیں
مِیٹر لا کے خوب چلائی صاحباں اوہدیاں وِیراں نیں
پر اجے قیامت نئیں آئی
سُکھ سرہانے بانہہ گوری، دُکھ سُوٹے چرسی چِلماں دے
بچے ٹیسٹ ٹیوباں دے، لَو لیٹر فِقرے فِلماں دے
مَت ماری گئی سیانف دی تے بھٹھے بہہ گئے عِلماں دے
پر اجے قیامت نئیں آئی
تاریخ تماشا بُھکھاں دا، تہذیب کھڈونا رَجاں دا
تنقید جگالی لفظاں دی، تشہیر سیاپا لَجاں دا
موسیقی راتب کُتیاں دا تے ادب گتاوا مجھاں دا
پر اجے قیامت نئیں آئی
دھیاں تِن بشیراں دے گھر، پُتر چار کمالے دے
پَوہڑیاں دے وِچ قِصہ مُکا، لوتھ گئی وِچ نالے دے
لوکی بیٹھے رِشتے جوڑن، پِپل تے پرنالے دے
پر اجے قیامت نئیں آئی
روگ ہزاراں، اِکو نُسخہ، اکو راہ گزارے دی
مکھن تاندلیانوالے دا تے ماکھی ضلع ہزارے دی
تِیراں اگے سینہ تانے جُرات جھوٹھ غُبارے دی
پر اجے قیامت نئیں آئی
دھک مکوڑے پڑھن نمازاں ، دعوے کرن خدائیاں دے
بند کران شراباں نالے پرمٹ لین عیسائیاں دے
وعدے پیندے آپیں کردے ناں بدنام ڈیسائیاں دے
پر اجے قیامت نئیں آئی
پارا تھرما میٹر دا، سیاست چوھدری طالب دی
ہیرا منڈی شاہیے دی تے دِلی مرزا غالب دی
چادر جنرل رانی دی تے چاردیورای جالب دی
پر اجے قیامت نئیں آئی
زیراں دی پَٹی دے مطلب نِکلن لگ پئے زبراں چوں
عینک پا کے انھے لبھن حق حقیقت خبراں چوں
ٹی وی دیاں قوالیاں سُن کے مُردے جاگے قبراں چوں
پر اجے قیامت نئیں آئی
روزگار دی سولی ٹنگے جِیویں کریلے دلاں دے
لوکی بکرے، لیڈر لوبھی قربانی دیاں کھلاں دے
پھل کھڑے قبراں دے اُتے سوہنیاں سوہنیاں گَلاں دے
پر اجے قیامت نئیں آئی
حرف شکایت، ہونٹھ تروپے، قافیئے تنگ ردیفاں دے
سنگھی نونہہ غریباں دی، ہتھ کَٹے گئے غریباں دے
لوہلے لنگڑے پار اُتارن، پُل صراط تریفاں دے
پر اجے قیامت نئیں آئی
چِٹے ورقے دَین شہادت کالی شاہ جہالت دی
سچل وعدہ معاف گواہی، نئیں رہی لوڑ وکالت دی
غصے دے نال تھر تھر کنبے کرسی عرش عدالت دی
پر اجے قیامت نئیں آئی
ویری اُچیاں محلاں دے پئے منگن راہ فصیلاں توں
منگن رحم قصائیاں کولوں تے خیرات بُخیلاں توں
خواباں دے وِچ بڑھکاں مارن موت ڈراوے مِیلاں توں
پر اجے قیامت نئیں آئی
عزت گئی اُستاداں دی تے بستہ غیب پڑھاکو دا
سیر گھیو دے مُل وِچ لبھے ہُن اِک پان تمباکو دا
ہنیرے دے وِچ پتہ نئیں لگدا تھانیدار تے ڈاکو دا
پر اجے قیامت نئیں آئی
نقلی دنداں ولے بُڈھے پُچھن بھاء اخروٹاں دے
سب توں بوہتیاں پڑھن کتاباں بوجھے اوور کوٹاں دے
لیندے پھرن مبارکباداں خالی ڈبے ووٹاں دے
پر اجے قیامت نئیں آئی
بیڑی پھرے آل دوالے ریت وِچ کھبے چَپو دے
رنڈیاں وانگوں وِکدے فتوے مولوی مال ہڑپو دے
پھانسی میلے وِچ پٹھورے ویچن قاتل پپو دے
پر اجے قیامت نئیں آئی
لوکی گھراں تے مورچے لا کے کرن حفاظت فوجاں دی
گُردیاں اُتے بنھ سرہانے ملہم لواندے سوجاں دی
سینسر لا کے کرن نمائش اپنے سارے کوہجاں دی
پر اجے قیامت نئیں آئی
ماں دا دُدھ سمجھ کے پی گئے نیک کمائی نانی دی
ملکہ دے دربار وِچ دادے دی تصویر جوانی دی
پوتریاں نوں نامنظور حکومت کِسے زنانی دی
پر اجے قیامت نئیں آئی
جمعے بزار سیاست وِکدی ودھ گئی قیمت گَڈواں دی
میئں شریف دے پُتراں نیں وی ڈھیری لا لئی لڈواں دی
بھٹو دی دھی تولن بیٹھی بھر ترکڑی ڈڈوآں دی
پر اجے قیامت نئیں آئی
اینی ہوئی منصوبہ بندی نوبت آگئی فاقے دی
ہر اِک چیز کھلوتی لگے ساہنوں ایس علاقے دی
دھوکہ چلدا اے یا فیر چلدی اے مرضی بابے ساقے دی
پر اجے قیامت نئیں آئی
