مینوں نت اڈیکاں تیریاں گھر آ پیا میں تیریاں...
مینوں تیرا جیا نہ ہور کوئی.. میرے جیان نے ہور بتہریاں...
(نا معلوم )
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شام اُڈیکاں، فجر اُڈیکاں
آکھیں تے ساری عمر اُڈیکاں
آنڈ گوانڈی دیوے بلدے
ربّا ساڈا چانن گَھلدے
جگ وَسدائے میں وی وَسّاں
کدھرے نہ پیندیاں دسّاں
کدھرے نہ پیندیاں دسّاں
وے پردیسیا تیریاں
فیض احمد فیض
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غریباں دی کُلی سجا طیبہ والےﷺ
اُڈیکاں دے دوزخ بجھا طیبہ والےﷺ
اَکھاں نوں مکھڑے دی سِک دے ہمیشہ
دلاں نوں تو مَسند بنا طیبہ والےﷺ
مینوں وَل نہ کوئی صدا کنج کریندی
خطا پوش بخشو خطا طیبہ والےﷺ
میں کمزور عمرانؔ تیرا گدا ہاں
توں اپنا بنا کے نبھا طیبہ والےﷺ
عمران آفتاب
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کال گھٹاواں، امبر چڑھیا، دھرتی کھولیا سینا
سمیاں دے پھُل اُٹھ اُٹھ ویہندے، آیا ساون مہینا
لالڑیاں نے رؤلا پایا، گھگھیاں گھو گھو بولن
امبیں تو تے ٹیں ٹیں کردے، الاں وی پر تولن
ووہٹی لاڑھا گھر بناکے کھیڈن بال ایانے
کہنے کہڑے دیس نوں جانا، ایتھے کوئی نہ جانے
بجلی لشکی، اُڈیاں چڑیاں، ترھبک گیاں مٹیاراں
کوئل غم دے گاؤن سناوے، ہلیاں دل دیاں تاراں
تویاں اُتے پوڑے پکدے، چھنکن چوڑے کچ دے
نند بھرجائی نیڑے ہوئیاں، نہیں سنیہڑے پچ دے
اکناں خاؤند کلاوے راتیں، اکناں چٹھیاں گھلیاں
اکناں دی تقدیر اُڈیکاں، کوٹھے تے چڑھ کھلیاں
شام پئی اسماناں اُتّے، پینگھ پئی ست رنگی
رنگ برنگیاں چُنیاں ویکھ کے، یاد آؤن پئے سنگی
سائیں اخترلہوری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہو جاوے جے پیار تے سونا بُھل جاندا
کیتے ہوون اقرار تے سونا بُھل جاندا
تارے گننے پیندے نیندراں آوندیاں نہیں
وچ اُڈیکاں رہندیاں اکھیاں سوندیاں نہیں
اکھیاں ہو جان چار تے سونا بُھل جاندا
ہو جاوے جے پیار تے سونا بُھل جاندا
کیتے ہوون اقرار تے سونا بُھل جاندا
رنگ برنگیاں رُتاں چنگیاں لگدیاں نہیں
اکھیاں جانوں اجے عشق دی اگ دیاں نہیں
رُس جاوے جے یار تے سونا بُھل جاندا
ہو جاوے جے پیار تے سونا بُھل جاندا
کیتے ہوون اقرار تے سونا بُھل جاندا
لیکھاں دے وچ لِکھیاں دُوریاں دُوریاں نیں
کی دساں میں پیار اچ کی مجبوریاں نیں
پیار اچ آوے ہار تے سونا بُھل جاندا
ہو جاوے جے پیار تے سونا بُھل جاندا
کیتے ہوون اقرار تے سونا بُھل جاندا
سوچاں دے وچ دن تے راتاں لنگھدیاں نیں
یاداں مُڑ مُڑ بری دل نوں ڈنگدیاں نیں
چھڑ پے جے تکرار تے سونا بُھل جاندا
ہو جاوے جے پیار تے سونا بُھل جاندا
۔۔۔۔۔ نج۔ف ۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دھی غریب دی بُڈھی ہو گئی بیٹھی داج اُڈیکدی
کن کسے دے واج نہیں پیندی اوہدی دُکھیا چیکدی
دلشاد احمد چن
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ماجد صدیقی
کسے اک دی گل تے من لے تُوں سبھے لوک نیں، تینوں سمجھان والے
دِلاّ جھلیا! کنتھوں اُڈیکنا ایں کدے پرت نئیں آوندے جان والے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صورت کوئی نہ بندی جاپے، سنگ مقصد، کڑمائی دی
وچ اُڈیکاں پھُل گانے دے، وِینیاں تے کُملا گئے نیں
ماجد صدیقی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اَج وی پپلی ہیٹھ کھلوتی
گُزرے سَمے اُڈیکاں
تیراں نالوں تکھے ہنجو
پلکاں اُتّے لیکاں
نی میں ڈاڈھی ماندی ہوئی
سُن سُن بول شریکاں
اوہدے آون دیاں
پُچھدی پھِراں تریکاں
اوہدے آون دیاں
لَے کے مونہہ ہتھاں دے وچ
بالاں وانگ میں روئی
میرے جہی دُکھیارن جگ تے
ہور نہ ہووے کوئی
وانگ شدیٹاں لِنباں کھوہواں
کون کرے دل جوئی
باجھوں ماہی دے
ہُن موئی کہ موئی
(اعجاز)
