قبلہ تسی چاہندے او کہ او لغت تہاڈے ہتھ وچ پھڑا دتی جائے تہانوں کج نہ کرناں پئے۔
بے ادبی معاف، تہانوں مغالطہ لگا اے سرکار، میں تے کدی وی ایہہ تاہنگ نئیں کیتی جے مینوں کجھ ناں کرنا پوے تے لغت میرے ہتھ وچ آ جائے۔ تہانوں نئیں پتہ، میں تے اک ورہے دا ایہدے مغر لگا ہویاں واں۔ خبرے کِنے فون کیتے نیں تے لاہور، فیصل آباد، تے پِنڈی وچ رہن والے کنے سجناں دے بوہے کھڑکائے نیں۔ کسے سبب پاروں میں آپ اردو بازار دا پھیرا نئیں لا سکدا۔ مینوں پتہ اے جے اردو سائنس بورڈ والیاں کئی ورہے پہلوں ارشاد احمد پنجابی ہوراں دی اک نامکمل جیہی لغت چھاپی سی جدھے وچ 'پنجابی توں اردو' تے' اردو توں پنجابی' دونویں اَکھر ہے سن، پر ڈھونڈن تے پتہ لگا جے ایہہ ہُن آؤٹ آف پرنٹ اے تے ناں اونہاں دی لائبریری وچوں تے ناں ای بازار دے کسے کتب فرش توں لبھ سکدی اے۔
تہاڈے دتے ہوئے ڈان دے ربط تے وی 'پنجابی توں اردو' دی لغت دا ذکر اے۔ ایہدے وچ لکھاری نے دعویٰ کیتا اے جے ایہہ 'پہلی وار' چھپی اے حالانکہ ایس توں پہلوں تنویر بخاری ہوراں دی اک بڑی جامع تے مفصل لغت منظرِ عام تے آچکی اے، جدھا تذکرہ ایس دھاگے دے شروع وچ کیتا گیا سی۔ نالے میں سجناں دی خدمت وچ ایہ لکھنا چاہنا واں جے میری لوڑ 'پنجابی توں اردو' نئیں
' اردو توں پنجابی' دی لغت اے۔
بولن یاں لکھن وچ اسیں بھاویں جنی وی پنجابی پئے ورتئے پر اک مترجم ہون پاروں مینوں کئی وار کسے اوکھے اردو اکھر نوں سِکے بند تے سُچی پنجابی وچ ڈھالن ویلے بڑی اوکڑ ہوندی اے۔ محفل دے پنجابی فورم تے ایہہ بینتی کرن دا کارن وی ایہہ ای اے جے مینوں بس خبر لبھ جائے جے کدھرے پنجابی توں اردو دی لغت چھپی اے۔ اگوںحاصل کرنا میرا کم اے۔
