جندے نی از افضل ساحرؔ

جِندے نی! تُوں کِیکن جَمّی
پیر پیر تے نِت بکھیڑے
جیون دی راہ لَمّی
جِندے نی! کِیہ لَچّھن تیرے
پَھنیئر نال یارانے وی نیں
جوگی وَل وی پھیرے
جِندے نی! کِیہ ساک سہیڑے
اِک بُکّل وِچ رانجھن ماہی
دُوجی دے وِچ کھیڑے
جِندے نی! کِیہ کارے کِیتے
آپے آس دے چولے پاڑے
آپے بِہہ کے سِیتے
جِندے نی! تک چیت وساکھاں
تُوں پِھردی ایں میل کُچیلی
دَس! تینُوں کِیہ آکھاں؟
جِندے نی! تیرا کارج کوڑا
سِر تے شَگناں والِیاں گھڑیاں
کَڈھ وچھایا ای پُھوہڑا
جِندے نی! تینُوں کیہڑا دَسّے
لُوں لُوں تیرا عیباں بَھریا
موت وٹیندی رَسّے
جِندے نی! تیرے ساہ نکارے
موئے مُونہہ نال آ بیٹھی ایں
جِیون دے دربارے
جِندے نی! کِیہ اَتّاں چائیاں
ہَس کھیڈن دی ویلھ نہ تینُوں
کردی پِھریں لڑائیاں
جِندے نی! کِیہ ویلے آئے
اِک دُوجے دی جان دے وَیری
اِکّو ماں دے جائے
جِندے نی! تیرے جِیون ما پے
آپے ہَتّھیں ڈولی چاڑھن
آپے کَرَن سیاپے
جِندے نی! کِس ٹُونے کِیتے
دِل دریا تے نین سمندر
روون بیٹھے چُپ چپِیتے
جِندے نی! کِیہ کھیڈاں ہوئیاں
پیو پُتراں دے پیرِیں پے کے
مانواں دِھیاں روئیاں
جِندے نی! کِیہ کاج کمائے
جِنّے وی تُوں سنگ سہیڑے
رُوح دے میچ نہ آئے
جِندے نی! کِیہ ہونیاں ہوئیاں
عِشقے دے گھر رہ کے اَکّھیاں
نہ ہَسیاں نہ روئیاں
جِندے نی! تیرے ساہ کچاوے
روز دیہاڑے مرنا پیندا
فیر وی موت ڈراوے
​