آج کا شعر

یاد کی خشک جھیل میں اکثر
بیٹھے رہتے ہیں پاؤں ڈال کے لوگ
احمد امیر پاشا

گل زار میں وہ رت بھی کبھی آ کے رہے گی
جب کوئی کلی جور خزاں کے نہ سہے گی
شریف کنجاہی

اس کی آنکھوں کو غور سے دیکھو
مندروں میں چراغ جلتے ہیں
بشیر بدر

ذرہ ام مہرِ منیر آنِ من است
صد سحر اندر گریبانِ من است
علامہ اقبال
ترجمہ:
اگرچہ میں ایک ذرہ ہوں لیکن اس زمانے کو روشن کرنے والا سورج میرا ہی ہے اور میرے گریبان میں سینکڑوں صبحیں سمائی ہوئی ہیں۔۔۔۔ اس پانچویں شعر سے مثنوی ’’اسرارِ خودی‘‘ کا آغاز ہوتا ہے۔ اقبال فرماتے ہیں کہ میں اگرچہ ایک ذرہ ہوں لیکن سارے زمانے کو روشن کرنے والا سورج بھی ہوں۔ اس سورج سے سینکڑوں ہزاروں صبحیں پیدا ہوتی ہیں۔ جس طرح سورج طلوع ہوتا ہے تو وہ صبح کا خالق کہلاتا ہے اسی طرح اقبال اپنے آپ کو اگرچہ ایک ذرے سے تشبیہ دیتے ہیں لیکن دعویٰ کرتے ہیں کہ میں ایسا ذرہ ہوں جو ’’مہرِمنیر‘‘ یعنی ’’چمکتا ہوا سورج‘‘ ہے جس سے ہزاروں صبحیں تخلیق ہوتی ہیں۔

یخ بستہ شب گزار کبھی تو بھی ہجر میں
میری طرح کسی سے مروت تجھے بھی ہو
محمد مستحسن جامی

ہم نے آباد کیا ملک سخن
کیسا سنسان سماں تھا پہلے
ناصر کاظمی

آپ کی یاد آتی رہی رات بھر
چشم نم مسکراتی رہی رات بھر
رات بھر درد کی شمع جلتی رہی
غم کی لو تھرتھراتی رہی رات بھر
(مخدوم محی الدین)

تیری صورت سے کسی کی نہیں ملتی صورت
ہم جہاں میں تری تصویر لیے پھرتے ہیں
امام بخش ناسخ

پھر چھڑی رات بات پھولوں کی
رات ہے یا برات پھولوں کی
پھول کے ہار پھول کے گجرے
شام پھولوں کی رات پھولوں کی
(مخدوم محی الدین)

وہ افسانہ جسے انجام تک لانا نہ ہو ممکن
اسے اک خوبصورت موڑ دے کر چھوڑنا اچھا
ساحر لدھیانوی

ہاں ہاں تری صورت حسیں لیکن تو ایسا بھی نہیں
اک شخص کے اشعار سے شہرہ ہوا کیا کیا ترا
بے درد سننی ہو تو چل کہتا ہے کیا اچھی غزل
عاشق ترا رسوا ترا شاعر ترا انشاؔ ترا
(ابن انشاء)

ہم ان کو سوچ میں گم دیکھ کر واپس چلے آئے
وہ اپنے دھیان میں بیٹھے ہوئے اچھے لگے ہم کو
احمد مشتاق

ہم پر یہ سختی کی نظر ہم ہیں فقیر رہ گزر
رستہ کبھی روکا ترا دامن کبھی تھاما ترا
(ابن انشاء)

مصیبت کا پہاڑ آخر کسی دن کٹ ہی جائے گا
مجھے سر مار کر تیشے سے مر جانا نہیں آتا
یگانہ چنگیزی

دل آباد کہاں رہ پائے اس کی یاد بھلا دینے سے
کمرہ ویراں ہو جاتا ہے اک تصویر ہٹا دینے سے
جلیل عالیؔ

سیر کر دنیا کی غافل زندگانی پھر کہاں
زندگی گر کچھ رہی تو یہ جوانی پھر کہاں
میر درد

دل پر دستک دینے کون آ نکلا ہے
کس کی آہٹ سنتا ہوں ویرانے میں
گلزار