الف سے اشعار

آواز دے کے چھپ گئی ہر بار زندگی
ہم ایسےسادہ دل تھے ہر بار آ گئے۔۔۔۔۔۔۔۔

ادھر آستمگر ہنر آزمائیں
تو تیر آزما ہم جگر آزمائیں

آلودۂ گناہ ہے اپنا ریاض بھی!!!!!!!!!!!!!!!
شب کاٹتے ہیں جاگ کے مغ کی دکاں میں ہم
حیدر علی آتش

اللہ رے بے قرارئ دل ہجر یار میں
گاہے زمیں میں تھے تو گہے آسماں میں ہم
آتش

آسماں پر کوئی تصویر بناتا ہوں، ظفر
کہ رہے ایک طرف اور لگے چاروں طرف
ظفر اقبال

اب یاد رفتگاں کی بھی ہمت نہیں رہی
یاروں نے کتنی دور بسائ ہیں بستیاں
فراق گو رکھپوری

اس فتنہ خُو کے در سے اب اٹھتے نہیں اسد
اِس میں ہمارے سر پہ قیامت ہی کیوں نہ ہو!
مرزا غالب

اللہ کرے، میرؔ کا جنت میں مکاں ہو
مرحوم نے ہر بات ہماری ہی بیاں کی
ابنِ انشا

امجد، نشاطِ زیست اِسی کشمکش میں ہے
مرنے کا قصد، جینے کا عزم، ایک سات کر
مجید امجد

اب تو لے دے کے وہی شخص بچا ہے مُجھ میں
مُجھ کو مُجھ سے جو جُدا کر کے چُھپا ہے مُجھ میں
کرشن بہاری نُورؔ لکھنوی

اللہ کرے جہاں کو میری یاد بھول جائے
اللہ کرے کہ تم کبھی ایسا نہ کر سکو
(صوفی غلام مصطفیٰ تبسم )

اُس سرو قد پہ اکبر، مُدّت سے مر رہا ہُوں
الله راست لائے، کوشِش تو کر رہا ہُوں
اکبرالٰہ آبادی

آیا ہے تُو جہاں میں مثالِ شرار دیکھ
دم دے نہ جائے ہستی ناپائدار دیکھ
علامہ اقبال

اے طائرِ لاہُوتی! اُس رزق سے موت اچھّی
جس رزق سے آتی ہو پرواز میں کوتاہی
علامہ سر محمد اقبال

آئینِ جوانمرداں، حق گوئی و بےباکی
اللہ کے شیروں کو آتی نہیں رُوباہی
علامہ سر محمد اقبال

آگ تھے ابتدائے عشق میں ہم
اب جو ہیں خاک انتہا ہے یہ
میر تقی میر

اپنے گھر کی کھڑکی سے میں آسمان کو دیکھوں گا
جس پر تیرا نام لکھا ہے اُس تارے کو ڈھونڈوں گا
امجد اسلام امجد

اب ہے اپنا سامنا درپیش
ہر کسی سے گزر گیا ہوں میں
جون ایلیا

آج واں تیغ و کفن باندھے ہوئے جاتا ہوں میں
عذر میرے قتل کرنے میں وہ اب لائیں گے کیا
مرزا غالب

آرزوئے چشمہ کوثر نہیں
تشنہ لب ہوں شربت دیدار کا
ولی