الف سے اشعار

اے قبلہ ! آپ مُجھ پہ چڑھے آتے ہیں یہ کیوں
ممبر اِس انجمن کا ہُوں، منبر نہیں ہُوں میں
اکبرالٰہ آبادی

ابن مریم ہوا کرے کوئی
میرے دکھ کی دوا کرے کوئی

آتشؔ یہی دعا ہے خدائے کریم سے
* محتاج اے کریم، نہ کیجو بخیل کا

اے ذوق تکلف میں ہے تکلف سرا سر
آرام سے وہ ہے جو تکلف نہیں کرتا

رباعی
اے عیش وطرب، تو نے جہاں راج کیا
سلطان کو گدا، غنی کو محتاج کیا
ویران کیا تونے نینوا اور بابل
بغداد کو، قرطبہ کو، نا راض کیا
اے عشق ! کیا تونے گھرانوں کو تباہ
پیروں کو خزف اور جوانوں کو تباہ
دیکھا ہے سدا سلا متی میں تری
قوموں کو ذلیل، خاندانوں کو تباہ

ادب یہ ہے کہ جہاں ان کا نام آجائے
وہیں زباں پہ درود و سلام آجائے
صلی اللہ علیہ وسلم

آگ تھے ابتدائے عشق میں ہم
اب جو ہیں خاک انتہا ہے یہ
میر تقی میر

اب نہ وہ سنگِ ملامت ہیں نہ وہ طعنوں کا شور
تیری بستی میں یہ رونق بھی مِرے دَم تک رہی
شمیم جے پوری

اِتنا ہی ہُوا حُسن میں وہ شُہرۂ آفاق
جِتنے ہُوئے ہم عِشق میں رُسوائے زمانہ
۔
بہادر شاہ ظفر

اوڑھے ہوئے تاروں کی چمکتی ہوئی چادر
ندی کوئی بل کھائے تو لگتا ہے کہ تم ہو
جاں نثار اختر