۶۔ طبی ایجادات میں آپ کے نزدیک سب سے عظیم ایجاد کیا ہے؟
یہ کہنا تو بہت مشکل ہے کیوں کی کوئی ایجاد تبھی ہوتی ہے جب ضرورت ہو ۔ اور اگر وہ اس ضرورت کو پورا کرتی ہے احسن طریقے سے تو وہ اپنے آپ میں بہت عظیم ہے ۔ طب میں ایجادات کی لمبی فہرست ہے ۔ لیکن اس وقت وینٹی لیٹر بنانے والے کا احسان ماننا چاہیے ۔
۷۔ تفریح طبع کے لیے کیا کرتی ہیں؟غصے کے عالم میں کیا کرتی ہیں؟
تفریح کے لیے غزلیں سن لیتی ہوں۔ کوئی کتاب پڑھ لیتی ہوں یا کچھ لکھ لیتی ہوں ۔ غصے میں آتی ہوں تو ضد کرتی ہوں ۔
۸۔کیا آپ روزانہ اخبار پڑھتی ہیں؟ اخبار کا کونسا گوشہ آپ کی دلچسپی کا مرکز ہوتا ہے؟
اتوار اور جمعہ کا پڑھتی ہوں ۔ اتوار کے دن افسانہ غزلیں اور کسی مشهور شاعر یا مصنف کے بارے میں ہوتا ہے ۔ جمعہ کے روز صحابہ اور ہمارے نبیؐ سے متعلق موضوعات ۔۔ اور اخبار ہاتھ میں لو تو پھر کوئی گوشہ نہیں چھوٹتا
۹۔ آپ کا فیلڈ طب یونانی ہے، کس یونانی حکیم سے متاثر ہیں اور کیوں؟
تمام اطبا ہی قابل احترام ہیں جنہوں نے اپنی پوری زندگی لوگوں کی تکالیف کو کم کرنے کے لیے وقف کی ۔ جس وقت طب نے اتنی ترقی نہیں کی تھی انہوں نے خود ملکوں ملکوں جا کر دواؤں کو تلاشا ان کے خواص و افادیت کو سمجھا اور آنے والوں کے لیے راہ آسان کی ۔
بہت سارے اطبا ہیں جن کا تاریخ میں نام یوں چمکتا ہے گویا آسمان پہ ستارے مگر ان سب میں ابو طب بقراط شیخ الرئیس بو علی سینا اور حکیم اجمل خاں قابل ذکر ہیں ۔
۱۰۔ طب یونانی کا لذیذ ترین معجون کون سا ہے؟
خمیرہ ۔۔ یہ مغلیہ دور کی ایجاد ہے ۔ اصل میں مغل بادشاہوں کی نازک مزاجی اور شاہی طبیعت کو مد نظر رکھتے ہوئے اسے بنایا گیا سو یہ لذیذ تو ہوگا ہی ۔ اس میں کئی طرح کے خمیرہ ہوتے ہیں لیکن حکیم ارشد والا افادیت و ذائقے کے لحاظ سے زیادہ بہتر ہے ۔
