جی ضرور ان شا اللہ ۔ اگر یہاں خطباتِ اقبال پر کوئی مستقل مرحلہ شروع ہوجائے تو ہم مقالے سے ہٹ کر اس بحث کا آغاز کرسکتے ہیں۔
آپ انتظار نہ کیجئے۔ شروع کر دیجئے
یہاں جس بحث کا آغاز ہوا ہے اس کے ضمن میں بس یہی عرض کروں گا کہ علامہ محمد اقبال نے زندگی کے امور اور زندگی کے ارتقا وغیرہ کے حوالے سے جو مباحث ہیں ان کے مکینکل ہونے سے انکار کیا ہے۔ وہ کہتے ہیں کہ ہم اشیا و افعال کا مطالعہ کرنے کے لیے انھیں اجزا میں تقسیم کرتے ہیں لیکن ساری تقسیم کا کل ہمیشہ مختلف ہوتا ہے ۔ زندگی کسی مکینکل سسٹم کی پیداوار نہیں ورنہ اس سے کئی قسم کے مسائل جنم لیں گے مثلاً یہ کہ زندگی عقل کو ارتقاء کی پیداوار گردانا جائے گا (جو کہ حیاتیات والے لوگوں کے مطابق درست بھی ہے )آپ انتظار نہ کیجئے۔ شروع کر دیجئے
اس حوالے سے دوسری نہایت اہم بحث یہ ہے کہ زندگی کے عام طور پر تین مدارج ہیں جن کے تحت ہم اس کا مطالعہ کرتے ہیں۔ ان میں فزکس، بائیولوجی اور سائیکالوجی ہے۔ اب اگر انسان کی ہی بات کی جائے تو اس میں یہ تینوں عوامل مسلسل رواں دواں نظر آتے ہیں ان میں الگ سے کچھ بھی نہیں لیکن انھی تینوں کے تحت جب ہم زندگی کا مطالعہ کرتے ہیں تو ہمیں الگ الگ زندگی کو دیکھنا پڑتا ہے ، ظاہر ہے اس صورت میں نتیجہ کبھی بھی درست نہیں نکلے گا، مثلاً مجھے بھوک لگتی ہے، مجھے سردی محسوس ہوتی ہے، میرے دل و دماغ میں سوالات جنم لیتے ہیں، میں محبت تلاشتا ہوں اور رحم و کرم سے قہر و غضب ایسی بہت سی کیفیات سے گزرتا ہوں ۔ یہ سب آپس میں مربوط ہیں ، ان میں الگ سے فزکس، بائیو یا نفسیات شامل نہیں، ان کا ربط اس قدر شدید ہے کہ ارتباط و انسلاک ہی ہے۔ الگ الگ ان عوامل کا مطالعہ کریں تو یہ تینوں علوم جو جدید علوم کے تاج ہیں، ان میں آپس میں جو بعد ہے وہ زندگی سے متعلق کوئی ایک درست نتیجہ مرتب نہیں کرنے دے گا۔ اسی ضمن میں انھوں نے معروف بائیولوجسٹ پروفیسر ہالڈین، ولڈن کار اور دیگر کئی کے حوالے پیش کیے ہیں۔ ہمارا ہر عضویہ نہ تو محض مکینکس ہے اور نہ ہی یہ مکینکس محض الگ الگ سے بائیو، فزکس اور نفسیات میں بٹی ہوئی ہے۔اور آسان کر لیں تو فزکس انسانی جسم میں محض حرکت اور انرجی کے بارے میں بتا سکتی ہے ، بائیو ہمارے آرگنز کی ساخت اور ان کے مسائل و حل کے بارے میں اور نفسیات ہمارے ارادی و غیر ارادی افعال کے بارے میں وغیرہ وغیرہ۔ اس طرح ان تینوں علوم کی بنیاد ہی زندگی کی مکینکس کو ثابت کرنے میں نہ صرف ناکام ہے بلکہ مفروضوں تک ہی محدود ہے ۔