فرحت کی موجودگی اور امن کی غیرموجودگی سے فائدہ اٹھاتے ہوئے کچھ سوالات ہم بھی پوچھ لیتے ہیں۔
پوچھ لیں اور میں بھی جانے سے پہلے جواب دے جاتی ہوں۔ آج سُستی ذرا گھومنے گئی ہوئی ہے۔
× آپ کہاں پیدا ہوئیں اور بچپن کہاں گزرا؟
کوئٹہ۔ ابا جان کی پوسٹنگ تھی وہاں۔ شروع کا بچپن وہیں گزرا۔ ہوش پنجاب میں آ کر سنبھالا۔
× کتنے بہن بھائی ہیں اور آپ کس نمبر پر ہیں؟
چار بہن بھائی ہیں۔ تین بھائی اور ایک میں۔ میرا نمبر دوسرا ہے۔
× اماں ابا میں سے کس کی زیادہ چہیتی ہیں؟
دونوں کی۔
× کتنی زبانیں جانتی ہیں اور کون کون سی؟
اردو ، پنجابی ، انگریزی۔
سرائیکی، ہندکو اور فرنچ کچھ کچھ سمجھ لیتی ہوں اور پہلی دو کچی پکی بول بھی لیتی ہوں۔ ٍفرنچ اور فارسی سیکھنے کا شوق ہے۔ کئی بار ارادہ بھی کیا لیکن ابھی تک عمل نہیں کر پائی۔
× کس طرح کی کتابیں پڑھنا پسند کرتی ہیں؟
جو بھی مل جائے۔ پچھلے کچھ عرصے سے خود نوشت سوانح عمریاں بہت پڑھی ہیں۔ شاعری مجھے اچھی لگتی ہے تو وہ بھی پڑھتی ہوں۔ فکشن بھی اچھا لگتا ہے۔ اور نان فکشن بھی پڑھنا پڑتا ہے۔
× کس طرح کے موضوعات پر لکھنا یا بات کرنا پسند ہے؟
زیادہ تو نہیں لکھتی۔ لیکن معاشرتی مسائل اور رویوں پر سوچنا ، بات کرنا اور لکھنا اچھا لگتا ہے۔
× اسکول، کالج اور یونیورسٹی میں محض تعلیم پر ہی دھیان دیا یا کچھ ہم نصابی سرگرمیوں میں بھی حصہ لیا؟ اگر نہیں تو کیوں اور اگر ہاں کن کن سرگرمیوں میں حصہ لیا؟
زمانہ طالبعلمی میں کافی ایکٹو رہی ہوں۔ پڑھائی اور ہم نصابی دونوں طرح کی سرگرمیاں ساتھ ساتھ چلتی رہیں۔ تقاریر ، میزبانی ، ڈرامے ، لکھنا ایسی ہی سرگرمیوں میں اساتذہ ڈال دیتے تھے اور میں شامل ہو جاتی تھی۔ سکول میں سٹوڈنٹ کاؤنسل کی ممبر تھی۔
× پاکستان کا کون سا شہر سب سے زیادہ پسند ہے؟
مجھے سارا پاکستان ہی بہت پسند ہے۔ لاہور میں بہت مزے کا وقت گزرا۔ اس لئے یہ سرِ فہرست ہے۔ کوئٹہ اپنے ہوش میں دیکھ نہیں پائی۔ اس سے میرا لگاؤ ویسا ہی ہے جیسا بچوں کو کہانیوں میں کسی فیری لینڈ سے ہوتا ہے۔ اسلام آباد چاہے پتھروں کا شہر لیکن مجھے اس کی خاموشی اپنی طرف کھینچتی ہے۔
نوشہرہ اور پشاور بھی پسندیدہ شہروں میں شامل ہیں۔
یہ لسٹ بہت طویل ہے۔ کیونکہ میں جس جس جگہ گئی وہاں کی کوئی نہ کوئی بات مجھے بہت اچھی لگی۔
۔ اور آپ تو ماشاءاللہ 'بہت زیادہ چھوٹے' ہیں شاید۔ 
۔
