17. خوشی کا اظہار کیسے کرتی ہیں؟
اللہ پاک کا شکر ادا کر کے۔۔ اور صدقہ نکال کر۔
خوشی کا فوری اظہار ایسا ہی ہوتا ہے۔ اور اگر بہت بڑی خوشی ہو تو اس کی یاد میں باغیچہ میں ایک جگہ مخصوص کر دیتے ہیں ہم اور وہاں چڑیوں اور کبوتروں کو دانہ ڈالتے ہیں روز۔ سمجھیں کہ ایک یادگار بنا دیتے ہیں اس جگہ کو کوئی نشانی لگا کر۔
18. کس بات پر غصہ آتا ہے؟
دوغلے پن پر۔۔۔
19. جب غصہ آئے تو پہلا رد عمل کیا ہوتا ہے؟
خاموشی اختیار کر لیتے ہیں۔ یہ پہلا ردِ عمل ہے۔
اس کے بعد اس بندے کو نظر انداز کرنا شروع کر دیتے ہیں۔
حقیقت یہ ہے کہ ہمیں زندگی میں گنتی کے چند بار ہی غصہ آیا ہے۔ تھوڑا وقت گزر جانے کے بعد بہتر ہونا شروع ہو جاتا ہے۔ اتنی دیر میں دوسرے بندے کو بھی غلطی کا احساس ہو جاتا ہے۔ اگر نہ ہو احساس تو ہم دلا دیتے ہیں۔ اور کبھی بڑی سے بڑی بات کا غصہ بالکل خاموشی سے پی جاتے ہیں۔ شور شرابہ کرنا یا غصہ نکالنا والا ہم برداشت کر جاتے ہیں بخوبی۔ کبھی تعلقات بحال کرنے میں خود پہل بھی کر لیتے ہیں جب محسوس ہو کہ دوسرے فریق کو بھی احساس ہے کہ اس نے کچھ غلط کیا تو نوبت یہاں تک پہنچی۔
ایک بار ایسا ہی ہوا کہ بھائی پر ان کی کسی بات سے غصہ آیا ۔۔۔ کچھ دن اسی طرح گزرے تو ہم نے سوچا کہ زندگی کے اگلے پل کا بھروسا نہیں تو کل کو والدین کے سامنے کیا منہ لے کر جاؤں گی کہ ان کے بیٹے سے ناراضگی ختم کر کے نہیں آئی۔ ہم نے صبح سویرے بھائ کو فون کیا اور کہا
"بھائی آپ کو بھی پتہ ہے کہ غلطی آپ کی ہے لیکن ہم اس لئے پہل کر رہے ہیں کہ ہم اس طرح سے امی ابو کے سامنے نہیں جانا چاہتے کہ وہ ہم سے پوچھیں کہ بھائی کو ناراض چھوڑ آئی ہو"
یہ تھا ہمارا غصہ، اس کا ردِ عمل اور اس کا علاج۔ مطلب تو یہی نکلا نا کہ ہمیں غصہ بس ہوا کے جھونکے جیسا آتا ہے، کچھ اڑا کر نہیں لے جاتا ۔
20. ڈانٹ کس بات پر پڑتی ہے؟
چونکہ ابھی ابھی پڑ گئی ہے ڈانٹ۔ تو وہی وجہ بتا دیتے ہیں
"اپنی نیند کا دورانیہ بڑھاؤ"
اس کے علاوہ کھانے پینے کے معاملے میں اکثر پڑتی رہتی ہے۔۔۔ کسی کسی دن تو ڈاکٹر کی دوائی کی طرح صبح ، دوپہر اور شام کی خوراک بھی ملتی ہے۔ کسی کسی دن افاقہ بھی رہتا ہے۔
آج کل "ٹکرانے" کی وجہ سے بہت ڈانٹ پڑتی ہے۔ احتیاط کرتے کرتے پھر سے کوئی سبب بن جاتا ہے ڈانٹ کھانے کا۔
کافی ہیں یا اور بتائیں؟ اس معاملہ میں ہم خاصے خود کفیل ہیں۔
