خوف کو نفیسات سے نکالنا ممکن ہوگا آپ کے لیے؟
اگر ہاں، تو کیا کریں گی؟ کس طرح؟
جب انسان اس بات کو سمجھنے کا شعور حاصل کر لے کہ خوف تو بس اندازِنظر ہے، اندازِ فکر ہے۔ ہمارے اپنے اندر کا واہمہ، جو آناً فاناً آ کر دل میں بیٹھ جاتا ہے ۔ اگر تو بس اس کی تاویلیں سننے لگو تو پھر تب تک جانے کا نام نہیں لیتا جب تک کسی حادثے کا سبب بن جائے۔ کبھی تو شروع ہی میں اس سے رہائی پائی جا سکتی ہے مگر کئی بار باوجود کوشش کے اس سے پیچھا نہیں چھڑایا جا سکتا۔ وجہ قوتِ ارادی کی کمی ہی ہے۔ ہاں اگر اللہ پاک پر بھروسہ کر کے قوتِ ارادی کے سہارے انسان "نتیجے" سے بے نیاز ہو جائے تو خوف دل میں گھر نہیں بنا پاتا۔ یا اگر کہیں خوف آپ کو گھیرے میں لینے کی کوشش میں ہے تو بھی وہ اس حد تک حاوی نہیں ہو گا کہ جڑ ہی پکڑ لے۔
خوف کا عنصر زندگی میں بس اس حد تک ضروری ہے کہ یہ انسان کو محتاط رہنے میں مدد کرتا ہے تا کہ وہ زندگی کے سفر میں مناسب اعمال کے ساتھ آگے بڑھے۔ دوسری صورت میں اس کا سارا تشخص ٹوٹ پھوٹ کا شکار ہو جاتا ہے۔ جس کی شدید ترین صورت ڈپریشن ہے۔ چونکہ بہت کچھ جھیلا ہے تب جا کر سیکھ پائے ہیں۔ اور سیکھ کر عمل کرنے کے بعد خوف کا حصار ٹوٹ گیا۔
قُربِ الٰہی ، ذکر الٰہی ۔۔۔ اس سب سے نکلنے میں بہت مددگار ہے۔ انسان خود کو اللہ پاک کے حوالے کر دے، نتائج کا خوف دل سے نکال کر اس ذات کا بھروسہ کرے۔ اللہ پاک کا خوف دل میں رکھے تو دنیاوی خوف سے نجات پا لیتا ہے۔
خوف انسانی جسم کے لئے وہ بدترین سزا ہے جو اسے اندر سے دبوچ لیتی ہے۔ بظاہر انسان کے جسم پر کوئی خراش نظر نہیں آتی مگر اس کا باطنی وجود ٹوٹ پھوٹ کا شکار ہو کر رہ جاتا ہے۔ خیالات اور عمل کے فرق کو بھی اگر کم کر دیا جائے تو بھی خوف کم کرنے میں مدد ہوتی ہے۔ محٖض خیالات کے تانے بانے بنتے رہنا اور عمل نہ کرنا انٹرنل انرجی کو کم کر دیتا ہے اور اس کی جگہ خوف لے لیتا ہے۔کبھی کام شروع کرنے میں پہلا قدم اٹھانے کا خوف، کبھی کام کے نا مکمل رہ جانے کا خوف۔۔۔ اس لے ضروری ہے کہ خواب و خیالات کے پہاڑ کھڑا کرنے کی بجائے عملی طور پر اپنےراستے کا ایک معمولی سا پتھر بھی ہٹا دیا جائے تو بھی انسان کو اپنی نفسیات سے خوف کو نکالنے میں مدد ملتی ہے۔
ہم نے دونوں سوالوں کا جواب اکٹھے ہی دے دیا۔۔۔
