محفل متراں دی — page 1 of 106

فاروق احمد بھٹی — مئی 12، 2015 2:31 شام

محفل وچ آن والے پنجابیاں دے لئی ایس لڑی نوں شروع کیتا اے کہ آنڈ گوانڈ دیاں اردو لڑیاں وچ پنجابی بول چال دے بارے اُلامے آن لگ پے نیں۔ جہیڑے کہ کسے حد تک صحیح وی نیں۔ نالے پنجابی فورم دا اُجاڑ پن پنجابیاں دے ہوندیاں ہویاں کج جچدا وی نئیں۔ تے میری تمام سجناں بیلیاں، پہناں بھراوں اگے بنتی آ کہ پنجابی وچ گل بات لئی ایس لڑی نوں ورتیا جاوے۔ تے جہیڑے میرے بہناں بھرا پنجابی نئیں جاندے اوہ وی کھلے دل نال ایس لڑی وچ گپ شپ وچ حصہ لے سکدے نیں۔ کسے دے آن جان تے کوئی پابندی نئیں۔ پنجابی دی لڑی ہووے تے پنجابی شاعری نہ ہووے اے کیویں ہو سکدا اے تے لو فیر کوٹ مٹھن دے پیرے دا سوہنا تے ودھیا کلام۔۔۔

کوئی بن گیا رونق پکھیاں دی
کوئی چھڈ کے شیش محل چلیا
کوئی پلیا ناز تے نخریاں وچ
کوئی ریت گرم تے تھل چلیا
کوئی بُھل گیا مقصد آون دا
کوئی کر کے مقصد حل چلیا
ایتھے ہر کوئی فرید مسافر اے
کوئی اج چلیا کوئی کل چلیا

محفل تے اسی لا دتی ہن متراں دا کم آ ایہنوں سجانا۔۔حقے پانی دا بندوبست وی ہےجے۔ تے آ جاؤ فیر

محترم محمد یعقوب آسی صاحب عبدالقیوم چوہدری تلمیذ اوشو غدیر زھرا نیرنگ خیال محمد اظہر نذیر دوست شمشاد لئیق احمد محمد احمد کامران چوہدری ادب دوست @

عبدالقیوم چوہدری — مئی 12، 2015 2:34 شام

جی او جوانا۔۔۔ بلے وئی بلے۔
ایس ویلے کج کماں وچ لگے اں ۔۔۔فیر آواں دا

فاروق احمد بھٹی — مئی 12، 2015 2:36 شام

عبدالقیوم چوہدری نے کہا:
جی او جوانا۔۔۔ بلے وئی بلے۔
ایس ویلے کج کماں وچ لگے اں ۔۔۔فیر آواں دا

اسی اُڈیک رکھاں گے تواڈے آن دی تے محفل وچ موجود باقی پنجابی بولن والے سجناں بیلیاں نوں وی دس دیا جے ایس لڑی دے بارے وچ

فاروق احمد بھٹی — مئی 12، 2015 4:00 شام

سجناں تے بیلیاں دی پنجابی دا ذوق تے شوق ودھان لئی وارث شاہ دی ہیر وچوں اک شاعری دا ٹوٹا جیہڑا کہ پینڈواں دی فجر ویلے دیاں رجھاں توں واقف کردا اے اور ۔۔۔۔۔۔۔۔۔۔ پنجاب دے اصلی رنگ تے لو پاؤندا اے ۔۔۔ پنجاب دا سوہنی تے ودھیا پنجابی وچ بیان۔۔۔۔۔۔

چڑی چو ہکدی نال جاں ٹرے پاہندیاں پئیاں ددھ دے وچ مدہانیاں نی
صبح صادق ہوئی جدوں آن روشن تدوں لالیاں آن چچلائیاں نی
اک نے اٹھ کے ریڑکا پا دتا اک ڈھونڈ دیاں پھرن ودھانیاں نی
اک اٹھ کے ہلیں تیار ہوئے اک ڈھونڈ دے پھرن پرانیاں نی
لئیاں کڈھ ہر نالیاں ہالیاں نے سئیاں بھوئیں نوں جنہاں نے لانیاں نی
گھر باہر نال چکیاں جھوتیاں نے جنہاں توناں گنھ پکانیاں نی

تے کیسا لگا پنجابی دا تے پنجاب دا ذائقہ مترو؟

اوشو — مئی 13، 2015 9:22 شام

نی سیو! اسیں نیناں دے آکھے لگے
جیہناں پاک نگاہاں ہوئیاں، سے کہیں نہیں جاندے ٹھگے
کالے پٹ نہ چڑھے سفیدی، کاگ نہ تھیندے بگے
شاہ حسین شہادت پائین، جو مرن مِتراں دے اگے

فاروق احمد بھٹی — مئی 14، 2015 2:57 صبح

اوشو نے کہا:
نی سیو! اسیں نیناں دے آکھے لگے
جیہناں پاک نگاہاں ہوئیاں، سے کہیں نہیں جاندے ٹھگے
کالے پٹ نہ چڑھے سفیدی، کاگ نہ تھیندے بگے
شاہ حسین شہادت پائین، جو مرن مِتراں دے اگے

میں کیا اوشو جی تسی کمال چیز پیش کیتی شاہ حسین رحمتہ اللہ علیہ یقینا پنجابی زبان دے سب توں وڈے شاعر منے جاندے نیں۔ اور بجا منے جاندے نیں۔ اوہ کی کیندے نیں
صاحب تیری بندی ہاں میں
چنگی ہاں یا مندی ہاں میں

عباس اعوان — مئی 14، 2015 3:17 صبح

میں کہیا سلاما لیکم !
پاجی کیہہ حال نیں !
کوئی روٹی ٹُکڑ، کوئی لسی شسی دا وی انتظام ہیگا کہ کوئی نئیں ؟؟؟
:donttellanyone:

اوشو — مئی 14، 2015 4:02 صبح

عباس اعوان نے کہا:
میں کہیا سلاما لیکم !
پاجی کیہہ حال نیں !
کوئی روٹی ٹُکڑ، کوئی لسی شسی دا وی انتظام ہیگا کہ کوئی نئیں ؟؟؟

ہو اعوان تے گلاں بٹاں والیاں

عباس اعوان — مئی 14، 2015 4:09 صبح

اوشو نے کہا:
ہو اعوان تے گلاں بٹاں والیاں

ہاہاہاہاہاہاہا
صرف گلاں ای بٹاں والیاں نیں

اوشو — مئی 14، 2015 4:12 صبح

فاروق احمد بھٹی نے کہا:
میں کیا اوشو جی تسی کمال چیز پیش کیتی شاہ حسین رحمتہ اللہ علیہ یقینا پنجابی زبان دے سب توں وڈے شاعر منے جاندے نیں۔ اور بجا منے جاندے نیں۔ اوہ کی کیندے نیں
صاحب تیری بندی ہاں میں
چنگی ہاں یا مندی ہاں میں

حقی گل اے۔ پنجابی شاعری خاص کر صوفیانہ شاعری وچ اک توں اک ودھ ہیرے نیں۔ شاہ حسین رح، بابا فرید رح، خواجہ غلام فرید رح، بابا بلھے شاہ رح، میاں محمد بخش رح، وارث شاہ رح، سلطان باہو رح، ہاشم شاہ توں لے کے پیر فضل گجراتی، استاد دامن، ڈاکٹر فقیر محمد فقیر، شریف کنجاہی سمیت کنے ای ناں نیں جیہڑے پیش کیتے جا سکدے نیں۔ میں دنیا دیاں کئی زباناں دا کلام پڑھیا اے پر جو ڈونگھیائی پنجابی صوفیانہ کلام چ اے ہور کسی وی زبان دے کلام دا ایس نال کوئی جوڑ نئیں بھانویں اردو ہی کیوں نہ ہووے۔ تسیں کی کہندے او ایس بارے؟

اوشو — مئی 14، 2015 4:13 صبح

عباس اعوان نے کہا:
ہاہاہاہاہاہاہا
صرف گلاں ای بٹاں والیاں نیں

ویکھنا! بٹاں دیاں گلاں کردے کردے کدھرے اعواناں نوں "بٹا" نہ لا دینا

فاروق احمد بھٹی — مئی 14، 2015 4:19 صبح

عباس اعوان نے کہا:
میں کہیا سلاما لیکم !
پاجی کیہہ حال نیں !
کوئی روٹی ٹُکڑ، کوئی لسی شسی دا وی انتظام ہیگا کہ کوئی نئیں ؟؟؟

والیکم سلام جی
آؤ جی آؤ ست بسم اللہ جی آیاں نوں سب کجھ لبھے گا ایتھے محفل متراں دی جے ہوئی

فاروق احمد بھٹی — مئی 14، 2015 4:31 صبح

اوشو نے کہا:
حقی گل اے۔ پنجابی شاعری خاص کر صوفیانہ شاعری وچ اک توں اک ودھ ہیرے نیں۔ شاہ حسین رح، بابا فرید رح، خواجہ غلام فرید رح، بابا بلھے شاہ رح، میاں محمد بخش رح، وارث شاہ رح، سلطان باہو رح، ہاشم شاہ توں لے کے پیر فضل گجراتی، استاد دامن، ڈاکٹر فقیر محمد فقیر، شریف کنجاہی سمیت کنے ای ناں نیں جیہڑے پیش کیتے جا سکدے نیں۔ میں دنیا دیاں کئی زباناں دا کلام پڑھیا اے پر جو ڈونگھیائی پنجابی صوفیانہ کلام چ اے ہور کسی وی زبان دے کلام دا ایس نال کوئی جوڑ نئیں بھانویں اردو ہی کیوں نہ ہووے۔ تسیں کی کہندے او ایس بارے؟

بالکل سچ آکھیا تسی جو گل پنجابی دی صوفیانہ شاعری وچ اے اوہ ہور کدھرے وی نئیں اوہدی وجہ جہیڑی میں سمجھیا واں اوہ اے آ کہ ہور کسے زبان وچ ایس انداز دی شاعری ہوئی ہی نئیں۔ عربی دی شاعری دا اپنا مقام آ پر اہو سانہوں سمجھ وی تے نئی اوندی۔
پنجابی صوفیانہ شاعری وچ اپنے مرشد نال محبت نوں بیان کرن لئی جو انداز اپنایا گیا وے اوہ پنجابی دا ای خاصہ اے۔ جیوں بابا بلھے شاہ
کہندے نیں
بلھے نو سمجھاون آئیاں پہناں تے بھرجایاں۔۔۔۔۔
یا فیر
دیوں اگے دھرو دیوال نی میرا پیا گھر آٰیا۔۔۔۔
وغیرہ
شاہ حسین علیہ رحمہ دا مقام پنجابی زبان دے حوالے نال ایس کر کے ودھ منیا جاندا اے کہ اوہناں نے پنجاب دی منظر کشی بڑی سوہنی تے ودھیا کیتی اے جیہدی اک مثال میں اتے پیش وی کیتی اے

فاروق احمد بھٹی نے کہا:
چڑی چو ہکدی نال جاں ٹرے پاہندیاں پئیاں ددھ دے وچ مدہانیاں نی
صبح صادق ہوئی جدوں آن روشن تدوں لالیاں آن چچلائیاں نی
اک نے اٹھ کے ریڑکا پا دتا اک ڈھونڈ دیاں پھرن ودھانیاں نی
اک اٹھ کے ہلیں تیار ہوئے اک ڈھونڈ دے پھرن پرانیاں نی
لئیاں کڈھ ہر نالیاں ہالیاں نے سئیاں بھوئیں نوں جنہاں نے لانیاں نی
گھر باہر نال چکیاں جھوتیاں نے جنہاں توناں گنھ پکانیاں نی

عبدالقیوم چوہدری — مئی 14، 2015 7:26 صبح

اوشو نے کہا:
نی سیو! اسیں نیناں دے آکھے لگے
جیہناں پاک نگاہاں ہوئیاں، سے کہیں نہیں جاندے ٹھگے
کالے پٹ نہ چڑھے سفیدی، کاگ نہ تھیندے بگے
شاہ حسین شہادت پائین، جو مرن مِتراں دے اگے

وا وا۔ ودھیا ملک جی۔۔
اج صبح کم تے نکلن لگیاں گڈی سٹارٹ کیتی تے موڈیولیٹر تے ایخو کلام چل پیا۔ تے ہُن آ کے محفل کھولی تے پہلے ای مراسلے وچ ایدے تے نظر پے گئی۔
اے کدرے میں نیناں دے آکھے تے نئی لگ پیا۔۔خیر۔۔۔ جے اے گل ٹھیک وی اے تے آخر وچ شہادت تے لبھ جائے گی۔۔۔نا :battingeyelashes:

اوشو — مئی 14، 2015 1:21 شام

عبدالقیوم چوہدری نے کہا:
وا وا۔ ودھیا ملک جی۔۔
اج صبح کم تے نکلن لگیاں گڈی سٹارٹ کیتی تے موڈیولیٹر تے ایخو کلام چل پیا۔ تے ہُن آ کے محفل کھولی تے پہلے ای مراسلے وچ ایدے تے نظر پے گئی۔
اے کدرے میں نیناں دے آکھے تے نئی لگ پیا۔۔خیر۔۔۔ جے اے گل ٹھیک وی اے تے آخر وچ شہادت تے لبھ جائے گی۔۔۔نا

مرنا تے انج وی اے تے فیر متراں تے جندڑی وارن چ کی ہرج اے

دونہاں جہاناں دی خیر ای خیر

فاروق احمد بھٹی — مئی 14، 2015 1:29 شام

عبدالقیوم چوہدری نے کہا:
جے اے گل ٹھیک وی اے تے آخر وچ شہادت تے لبھ جائے گی۔۔۔نا

اوشو نے کہا:
مرنا تے انج وی اے تے فیر متراں تے جندڑی وارن چ کی ہرج اے دونہاں جہاناں دی خیر ای خیر

متر تے جان پے وارو پر پہلاں متر دی تفصیل ہو جاوے جے کدے ممکن اے؟

عبدالقیوم چوہدری — مئی 14، 2015 2:30 شام

فاروق احمد بھٹی نے کہا:
متر تے جان پے وارو پر پہلاں متر دی تفصیل ہو جاوے جے کدے ممکن اے؟

تسی مینوں کروں کڈانا اے۔۔۔۔۔۔۔۔۔۔۔۔۔۔۔۔۔

اوشو — مئی 14، 2015 2:41 شام

فاروق احمد بھٹی نے کہا:
متر تے جان پے وارو پر پہلاں متر دی تفصیل ہو جاوے جے کدے ممکن اے؟

انّاالحق دِی اوہ گل پُچھدے، میں پلڑا کھسّاں کیہ دسّاں؟
دسّاں تفسیر مُحبّت دِی؟ میں جانڑ کے پھسّاں کیہ دسّاں؟
حالات ظفر دِی زِندگی دے ، سرمد دا قِصّہ سائیں حیدر
کیہ دسّاں درد پیاراں دے ، سُولی دِیاں چسّاں کیہ دسّاں؟

فاروق احمد بھٹی — مئی 14، 2015 4:07 شام

عبدالقیوم چوہدری نے کہا:
تسی مینوں کروں کڈانا اے۔۔۔۔۔۔۔۔۔۔۔۔۔۔۔۔۔

گھروں تے بوت دور او تسی ۔۔۔۔۔۔۔۔

فاروق احمد بھٹی — مئی 14، 2015 4:18 شام

اوشو نے کہا:
انّاالحق دِی اوہ گل پُچھدے، میں پلڑا کھسّاں کیہ دسّاں؟
دسّاں تفسیر مُحبّت دِی؟ میں جانڑ کے پھسّاں کیہ دسّاں؟
حالات ظفر دِی زِندگی دے ، سرمد دا قِصّہ سائیں حیدر
کیہ دسّاں درد پیاراں دے ، سُولی دِیاں چسّاں کیہ دسّاں؟

کج دسو سانوں یار سجن، اے اکھیاں دا بیوپار سجن؟
کج حرف محبت بارے دس ، تو انج نہ کر ہن یار سجن
کن ترسن تیریاں گلاں نوں، نہ سمجھیں میریاں گلاں نوں
نہ ایڈا بن توں کملا ہن، توں ڈاھڈا ایں فنکار سجن
برجستہ از فاروق احمد