بسم اللہ الرحمن الرحیم
تمام تعریفیں اللہ کے لئیے
سمیع اللہ بھائی آپکی محبت ہے وگرنہ میں کسی کو کیا سکھا سکتا ہوں بھلا، آپ دوستوں سے ہی سیکھتا ہوں اور پھر اگر کسی کو اسکی ضرورت پڑے تو آپ دوستوں کی جلائی علم کی شمع کو آگے بڑھا دینے میں خوشی محسوس کرتا ہوں۔ دیپ سے دیپ جلانے سے ہی علم بڑھتا اور تاریکی کم ہوتی ہے، اور اسی پر عمل کرنے کی کوشش کرتا ہوں۔
آپ نے جتنے اچھے الفاظ میں مجھے خوش آمدید کہا ہے، مجھے افسوس ہے کہ میری اردو لغت کمزور ہونے کے باعث اتنے ہی اچھے الفاظ میں آپکا شکریہ ادا کرنے سے قاصر ہوں۔
آپکا تہہ دل سے شکریہ اور اللہ سے دعا ہے کہ وہ آپکو ہمیشہ اپنے حفظ و امان میں رکھے اور اپنا کرم خاص فرمائے۔ آمین۔
والسلام
السلام علیکم ورحمۃ اللہ وبرکاتہ
نوید بھائی! ویسے تو آپ جب بھی آتے ہیں، ایک خوشگوار حیرانگی ساتھ لے کر آتے ہیں۔ یعنی کبھی فوٹو شاپ کی کوئی حیرت انگیز ٹپ، کبھی آئی ٹی کے سوال وجواب کے زمرہ میں پریشان سائلین کے مسائل کا چٹکی بجاتے حل، گپ شپ اور مزاح میں بھی شائستگی کا ایک خاص انداز۔ یہ تمام خصوصیات آپ کو محفل میں ممتاز کرنے کے ساتھ ساتھ اہل محفل کو خوش گوار حیرت میں بھی مبتلا کرتی ہیں۔ لیکن اس بات کا تو میں تصور تک نہیں کرسکتا تھا کہ اٹلی میں رہنے والے فرد کی اس قدر نستعلیق اردو اور اتنا شائستہ انداز ہوسکتا ہے، اس قدر علمی شخصیت ہونے کے باوجود اس قدر انکساری اور اس پر مستزاد یہ کہ پھر بھی اپنی اردو لغت کے کمزور ہونے کا اعتذار۔ بس اب مزید حیران ہونے کی بالکل بھی گنجائش نہیں رہی، آج تو گویا آپ نے حیران کرنے کی حد ہی کردی۔
بہرحال اگر میں نے آپ کو خوش آمدید کہا ہے کہ تو آپ بھی مجھے مبارک باد دیجئے کہ میں نے میم نون کی شکل میں ایک انتہائی قیمتی، مخلص اور پیارا دوست پایا ہے۔
اللہ آپ کو دونوں جہانوں میں کامیابی عطا فرمائے، آپ یونہی محفل کی رونق بڑھاتے رہیں اور اہل محفل کو اپنی ذات سے فیض یاب کرتے رہیں۔ آمین
والسلام
